الثلاثاء، 3 نوفمبر، 2009

ممكن اطلب ايد بنتك


فكرت يا حلو قبل ماتقدم الخطوة دى هتعمل ايه

احب انبهك انك دخلت فى دوامة ملهاش اخر

واللى بيشيل اربة مخرومة بعون الله هتخر على نفوخك انتا واهلك

معاك شقه

ولو معاك شقه تمليك ولا ايجار

لالا انا بنتى متسكنش فى شقه ايجار لازم تمليك

وخمس اوض و3 حمامات

طب ايه لزوم ال3 حمامات

حمام بنتى تعملى بى بى فيه

وحمام تستحما وتنضف فيه والحمام الاخير ده تبقا تعمل الساونا فيه

طب وانا

انتا مش مهم

اعملها على روحك

ولازم الشقه بأسم المحروسة بنتى

امال ايه انا بنتى مش اى حد

وهيا اساسا فى الاخر تلاقيها معاها دبلون خراطة

من معهد دولسى عادى يعنى


طب والعفش

بص يبنى احنا مش بنجهز

انتا اللى بتجهز كل حاجة

اوضة نوم انترية

وسفرة واوضة العيال لما تتنيلو تخلفو واهم حاجة الميكرويف وغسالة الاطباق

انا بنتى طول عمرها مدلعه ومتغسلش على اديها

اما بقه بلنسبة للشبكة

احنا ناس عنينا مليانة

والشبكة دى تعتبر هدية منك ليها

احنا مش هنكلم فيها

بس اقل من 25 الف دهب مينفعش

ولازم يكون لازوردى من بتاع البت المزة اليسا ونانسى


والمؤخر

يبقا 100000000(انا مش عارفه ايه الاصفار الكتير دى بس مش مشكلة )

عشان ان شاء الله بنتى هتقرف اللى خلفوق

وتبيعك اللى وراك واللى قدامك

وتطلب الخلع والطلاق فى نفس ذات الوقت

ونبقا احنا طلعنا بلمؤخر والبت تكون

امنت مستقبلها

وتجوز بقه واحد متريش

يعرف مقامها

والفرح يا حلو طبعا عليك

وفى قاعه فخمة

وتجيب بيبسى كانز

وعلبه جاتوه للمعازيم

وتجيب تورتة 16 دور

هو انا بنتى اقل من بنت ام عزيزة جارتنا ولا ايه

والفستان

انا بنتى متلبسشى فستان مكان حد ابدا

لازم تشتريلها فستان

ومش من مصر

لازم يبقا من باريس

واشرب بقه يا حلو

*********************************

انا كتبت البوست ده لكل شاب بيفكر يجوز

اينعم انا بنت

بس احنا اساسا مش ناقصين قرف وجواز

ونيلة على دماغكو

فا احسنلكو

محدش يتتقدملنا

احنا كدة مستريحين

وان فكرت ياحلو

تجوز وتاخد الخطوة دى

متلومش الا نفسك

ان كيدهن عظيم

********************************

بجد بجد

والله وحشتونى جدااا

وبقالى كتير مش لاقيه ححجم الخطد ارخم ولا اناكف فيه

عمالة اخانق دبان وشى

وبقالى كتير مش بعلق عند حد

بس معلشى

انا مش بكتب غير لما يكون ليا نفس اكتب

وان اكتبت البوست ده عشان ادهم بس

وعشان خاطر عيوينو

مين ادهم ده راجع تعليقات البوست اللى قبل اللى فات

**********

سنكيوز

هناك 67 تعليقًا:

Pink Dreams يقول...

ههههههههههههههه

ايه دا يا بنتى حرام عليكى

ا اسمه عذاب مش جواز

وانا اقول ايه مشكله العنوسه فى مصر

اتاريكى انتى السبب

هههههههههههه

Pink Dreams يقول...

ايه دادا انا كنت اول تعليق وانا اللى بحسب التعليقات عليها اشراف

طب انا قاعده هنا بقى شويه

Pink Dreams يقول...

وناخد تالت تعليق كمان بقى

Pink Dreams يقول...

وحشانى مووت يا مشمشه

اموووووووووووووووواه

mohamed ghalia يقول...

ههههههههههههههه
ولا بيجيب معانا الكلام ده
هنتجوز يعنى هنتجوز
ههههههههههههههههه

فتاه من الصعيد يقول...

هههههههههههههههه

اولا عود احمد

وعندك حق والله .... طلبات عجيبه بنسمع عنها

تحياتي

مامة مازن يقول...

هههههههههههههههههه
اولا ازيك يا مشمشتى
ثانيا انتى شردتى الدنيا كلها كده ليه
ثالثا يا امى اصلا مفيش عرسان اساسا الرؤجالة عاملة اضراب ولما بيفتكروا بيبقوا خلاص عدوا السن القانونى ههههههههه
يا اما لسه صغنن على باب الله والناس خلاص بقت تقايس وتجوز بناتها وخلاص هيستنوا المواصفات اللوذعية دى يبقى مفيش واحدة هتشوف وش الماذون شكله ايه هههههههههه
نتكلم بجد بقى: فهمت طريقتك التهكمية بس فعلا الناس بقت من الوعى انها تبطل الطلبات السخيفة دى وبقت من الوعى الاكتر انها تقبل وترضى بذات الدين وبمن ترضون دينه خلاص فى نوع من الوعى صحيح قليل مش بالكثرة المفروضة ولكن فى الناس هدت اللعب شوية لما لاقوا مفيش فايدة والظروف لامؤاخذة من زفت لازفت سورى يعنى
بتعجبنى موضوعاتك على فكرة جدا بحب وجهة نظرك فى حاجات كتير لانها تحترم جدا وبحس ان دماغك فيها حياة خلايا بتشتغل مش راكنة
تحياتى ليكى يا صغننة انتى وربنا يرزقك بابن الحلال ويكون قمر شبه مازن ابنى

مامة مازن يقول...

لا شوفى استاذ محمد بيقولك ايه هنجوز يعنى هنتجوز هى دى الروح يا شباب ههههههههههههههه

Super Adham يقول...

لو كنت باعرف ازغرط كنت زغرطت

ايه البوست الجامد ده
ايه الحلاوة دى ايه الطعامة دى

وحشنا كلامك العسول ده

أنا هدبح تنين و اوزعه على الفقراء بمناسبة ان اسمى اتكتب فى المدونة بتاعتك بس

انا هطبع البوست ده و اعلقه فى اوضتى اصلا

و كتعليق رفنتوع على البوست و عشان اغيظك احب اقوللك ان واحد صاحبى لسه من شهر ما كانش معاه تمن شيكولاتة جالكسى مكسرات ,,, جاتله عروسة زى القمر و ابوها أغنى من الملك فاروق مش عايز منه ولا مليم ,,, عايز بطاقته و ربع جنيه بس ,, احنا بنشترى رجالة يا ابنى ,,, هع هع هع

هى بصراحة بترجع للاهل قبل كل حاجة

عموما اما نشوف لما اتقدملك هتعملوا معايا ايه ,, هتعملى كدا ؟
ولا هنبنى عشنا طوبة فول و طوبة فلافل

اشطاط بالمربى

أشكرك بجد لغاية يوم التلات اللى جاى

ربنا يخليكى لينا ,,,

سلام عليكم

فشكووول يقول...

ازيك يا مشمشيه

الواد اتنحل وبره قبل ما يتجوز
دا اذا كان عنده وبر
وحيجيب الوبر ده منين
وعايزانى ابقى حماكى
يا اختى انههههه

حاجيب منين كل ده
صحيح ان كيدهن عظيم

بقول لك ايه .. البنت الحلوه اللى صورتها عندك دى جايباها منين .. عايز امد ايدى فى الكمبيوتر واطلعها .. تقوليش حوريه من الجنه .. آهو دا اللى الواحد ممكن يدفع فيها دم قلبه وما يندمش خالص .. كلام ابن عم حديت

فشكووول يقول...

السلام عليكم

يا ساتر يا رب

فى اول زياره الاقى اكياس وسواطير

الحمد لله الحاجه راحت تحج والواحد مش خايف على نفسه اليومين دول

تحياتى

فشكووول يقول...

ايه اللى حط التعليق اللى فوق ده هنا .

انا كنت كاتبه عند مامة مازن

ارزاق

ستيته حسب الله الحمش يقول...

عاوزاك تريحي نفسك يا مودموازيل
أول ما يطب سي دعبس بعلك
واول ما تبصي لجماله وعيونه وشنبه
ها تلاقي نفسك يتقولي
بعبه يا بابااااااااااااااااااااااااا
عاااااااااااااااااااااااااااااااااااا
واحنا اللي ساعتها ها نفكرك مع محاولات مستميتة منا لإخفاء الشماته
وعلى رأي راندا حافظ
انا طول الوقت مكسوفة اجي اتكلم بتلخبط ليه
بجد بجد ملهوفة مينفعش ارمي نفسي عليه
بجد بجد مش عارفة ايه اللي انا فيه
يظهر ده اللي اسمه ايه :)

*البت المشمشية *حلوة بس شقية * يقول...

Pink Dreams
طبعا يبنتى ولازم نرفع الشعار بكدة وانتى معايا طبعا
غصب عنك
عااااااااااااااااااا

*البت المشمشية *حلوة بس شقية * يقول...

Pink Dreams
انتا اللى وةحشنى مووت يا معلم
وخد راحتك المدونة مدونتك عادى يعنى وانا اقعد فى الشارع مش مشكلة

*البت المشمشية *حلوة بس شقية * يقول...

mohamed ghalia

اتجوز يا خوية
بكرة تيجى تعيط

*البت المشمشية *حلوة بس شقية * يقول...

فتاه من الصعيد
عقبال مانفرح بيكى

*البت المشمشية *حلوة بس شقية * يقول...

مامة مازن
بجد واله انتى ست زىا لعسل وربنا

وايه انتى عندك خلايا شغالة دى
والله طبيعى مش حشيش

*البت المشمشية *حلوة بس شقية * يقول...

مامة مازن
خليه بجوز بكرة يجى يعيط

*البت المشمشية *حلوة بس شقية * يقول...

Super Adham

ههههههههههههه
ايه الهيصةى والدوشة
اللى انتا عاملها دى
اقعد هنا بشويش

واى خدمة يا معلم
ومن ناحية انك لو فكرت تيجى تتقدم

انصحك بلاش
لانى مفترية
وهنتقم منك بجد

*البت المشمشية *حلوة بس شقية * يقول...

فشكووول
اخس عليك يا عممو
ده انا بقول عنك حبيبى قلبى
تقوم تستخسر تدفع فيا كل ده
ماشى ماشى
لما ابنك يجيلى بس
هقطعهولك واحطهولك فى اكياس

*البت المشمشية *حلوة بس شقية * يقول...

فشكول
ايه اللخبطة دى بقه
بس فى بتها دى ماما مازن حبيبتشى يعنى

*البت المشمشية *حلوة بس شقية * يقول...

ستيته
لاء بقلك ايه
انا عايزة شبكة تمام
وعريس مرجلش
يارب اوعدنى عشان محدش يشمت فيا يارب
حاكم ان اعرفاكو

كيكى عوووووو يقول...

وانا جايه اقولك وحشانى
الاقى الكلام دة !!!!
يالهوى عليكى ناكفى مع دبان وشك احسن

*البت المشمشية *حلوة بس شقية * يقول...

كيكى
منا فاضية بقه يا كيكى
ومش لاقيه غير الدبان اتخانق معاه

مـجـنـووون يقول...

أنتني بتقولي فيها

الشاب اول ما يتجوز بيبقي مبسوط وفرحان وبيحسبها سيبه بس اول ما يدخل البيت يحس بالنصيبه الي هو كان هيقع فيها

بس تعرفي انه علشان يوصل لنصه التاني ممكن يهد جبال

وعلشان كده في الاسلام كان في تساهل لتيسير أمور الزواج

تقبلي مروري
مجنووون

A.SAMIR يقول...

بداية
سيادتك فين من زمان
فين تعليقاتك عندي في المدونة؟
احنا فينا من الكلام دة؟؟؟
ماشي يا شيماء هانم
ثانيا
الجواز علينا حق و كاس و داير على الجميع

مطلق يقول...

الي فاضل انك تتجوزيني و اخلف انا|||||

عاشق الجنة من الإخوان صلى على النبى يقول...

بصي بقي يا بت يا مشمشية
بجد مدونتك جميلة قوي قوي
والبوست ده جميل جداً
وبصراحة نا معجب جداً بمدونتك
بس يا ريت نرجع لاسلامنا ول ده حصل
مش هنلاقي أي مشكلة من اللي قلتي عليهم دول
في انتظار زيارتك عشان تنوري مدونتي
صلي علي النبي

قلم رصاص يقول...

محلاها عيشة الحرية ولعب الفيفا 2007

ههههههههههههههه

حمدلله على السلامة

نورتي مكانك تاني

في حفظ الله

*البت المشمشية *حلوة بس شقية * يقول...

مـجـنـووون
ههههههههههه
طيب عقبال ماتهد جبال انتا كمان
ونفرح فيك قصدى نشمت فيك

*البت المشمشية *حلوة بس شقية * يقول...

A.SAMIR
احمد باشا
والله انا اسفه جدا انا مقصرة مع الكل
بس الحبابيب مفروض ميزعلوش
صح ولا اه يا معلم
وسامحنى على تقصيرى
وجاية قريب
من نقدرش نتاخر عنكم

*البت المشمشية *حلوة بس شقية * يقول...

مطلق
اتجوزك
ده انا اروح انتحر احسن يا كريم

ده انتا هتطلع فيا عقدك كلها

*البت المشمشية *حلوة بس شقية * يقول...

عاشق الجنة من الإخوان صلى على النبى
هههههههههه
والله انا مقدرش ع الكلام الحلو ده
وياريت نفهم ان الجواز تيسير
مش شبكة وعفش

*البت المشمشية *حلوة بس شقية * يقول...

قلم رصاص
هههههههههههههه
هتضحى بلجواز عشان الفيفا
هههههههههههههههه

أبو أمك يقول...

كل ده عشان أطلب إيد بنته
أمال بقى لو كنت طلبت معاها بطاطس وبيبسي

~PakKaramu~ يقول...

Pak Karamu visiting your blog

smilyrose يقول...

هههههههههه

حمدلله على السلامة

وحشتنى شوقتك جدااااااااااااااا

وبعدين ايه يابنتى

وليه كل دا هما دبلتين وعلى المأذون

وبعد كدا يشحتو على باب السيدة

ههههههههههههههههههه

ملحوظة ممكن بلاش اللون الاصفر

عندنا حول والله ههههههههه

منورة يا قمر

اختك وردشان

micheal يقول...

هههههههههه....أنا حاسس أني دخلت فيلم أبيض واسود شايف فيه ميمي شكيب وسراج منير وهما مطلعين عين عريس بنتهم الغلبان اللي جاي يتقدم
تحياتي

حـــلـــم كــــان يقول...

ده والله انتى جامده

خلصتى

احنا مش عايزين حد يتقدملنا

أحمد عاطف يقول...

ولنفس ذات الاسباب اللي انتي قولتيها دي ماتجوزتش

افتكر في احدى محاولات الجواز الفاشلة ان ابو العروسة مكانش عاجبه اني اشتريت شقتي في القاهره وليه ماشتريهاش في الزقازيق بما اني في الاصل من هناك

واني لازم اشتري شقة في الزقازيق

يا حاج ممعاييش والليم عايا دفعته خلاص في الشقة


ماليش دعوة بيع بتاعة القاهره واشتري في الزقازيق

بس انا شغلي في القاهره

وانا مالي روح القاهره كل يوم

بس انا معنديش عربيه

بردو وانا مالي اشتريلك عربية

لا اوفر من دا كله وتيجي تقولي العفش يبقى لونه محمحي

بنتك عندك وفلوسي في جيبي اوفر لي

خليها تعنس

شفـقــة و إحســــان يقول...

كل سنة وانتى طيبة وعيد حب سعيد
تحياتى شفقة

اقصوصه يقول...

loooooooool

نعم للعنوسه

لا للزواج :)

*البت المشمشية *حلوة بس شقية * يقول...

ابو امك

بطاطس وشيبسى ايه
انتا طالب دليفرى
الرقم غلط

*البت المشمشية *حلوة بس شقية * يقول...

PakKaramu~
زورتها بس مفهمتش حاجة

*البت المشمشية *حلوة بس شقية * يقول...

smilyrose
انتتى كمان يا قمر وحشانى اوى

*البت المشمشية *حلوة بس شقية * يقول...

مايكل
ده انتا هتتظبط لو فكرت تتقدم لوحدة

*البت المشمشية *حلوة بس شقية * يقول...

حـــلـــم كــــان
انا عن نفسى عايزة

*البت المشمشية *حلوة بس شقية * يقول...

أحمد عاطف
يعينى يبنى
والله صعبت عليا
وبعدين ابوها رخم كدة ليه
يروح هو يجوزها بقه

*البت المشمشية *حلوة بس شقية * يقول...

شفـقــة و إحســــان
وانتى طيبة يا قمر
وحمد لله ع السلامة

*البت المشمشية *حلوة بس شقية * يقول...

اقصوصة
تلاقيكى انتى اول واحدة هتجوزى فينا

فتاه حالمه يقول...

وحشتيني يا بت انتي
فينك
عارفه مين انا
ايون ماما مي يا وحشه يلي نسياني :(

*البت المشمشية *حلوة بس شقية * يقول...

فتاة حالمة
مى
هو انتى مى اسامة فيس بوك
انتى عندك مدونة
اول مرة اعرف

كلمة صدق يقول...

السلام عليكم اسمحيلى امر عندك وأهنيك على الدعوة الجميلة للجواز والتفائل ربنا يوفقك امين يارب

عاشقه الرومانسيه يقول...

يابنتى اتكلمى عن نفسك
حرااااااام عليكى
عايزين نتجوووووووز
انا مش مع مشمشيه ولا اعرفها ياجدعااااان

فتاه حالمه يقول...

yap
انا مي اسامه فيس بوك يا ندوله انتي
انتي فين يا به ومش بتسالي ليش؟؟؟؟

حلم بيعافر يقول...

هههههههههههههههههههه
لا متخافوش مفيش جواز
دكل الشباب دللوقتى متشردين ومش لاقيين ياكلوا
هههههههههههههههههههه
دلو حد قدر يجيب عشر الكلام اللى انت قلتيه ده يبقى لقطة
تقبلى مرورى

همســات عــلى ضــوء الــقمر يقول...

صباح الخير يامشمية

وحشانى جدا

معلش مقصرة الفترة اللى فاتت

بس تتعوض بقى

همســات عــلى ضــوء الــقمر يقول...

ههههههه

ايه دا يابنتى

الواد اللى هيقرا هينتحر قبل مايتجوز

وبعدين انت كدا هتقطعى علينا بقى
احنا عايزين عرير

علشان نفسى ابلس الفستان وابقى عرورة

هههههههه

بس تسلم ايدك
وعايزاكى كدا تكررى الزيارة

(دموع القمر)

فكرة من الزمن ده يقول...

هههههههههه

:)

الحملة المشمشية المفترية لمناهضة الزواج
بوست حلو ورايق
وينضم لبوست حاسوباتية اللي حطت فيه صورة تقطع الخميرة من العيش
تحياتي

اللى موش عارف يتغير يقول...

ياسلام
وانت اللى شايفه ان احنا عايزين نعرفكم
عالاقل الواحد يرتاح من الكلام الكتير واللوك لوك عالفاضى والمليان
بس عشان اكون حقانى
متنفعش الحياة من غيركم
وعلى راى ستنا مارى منين
كاتكو نيلا
ههههههههههههه

بسنت صلاح الدين يقول...

ايه يا قمر الحمله الشعواء دى بس ،،، بس عجبتنى حته التلات حمامات دول جديده

م/محمود فوزى يقول...

السلام عليكم
على فكره باه ممكن تلاقى فعلا ناس تعمل الحركات دي او شبهها
طبعا صعب انه كل ده يحصل لانه بكل بساطه هاتلاقى اللى اسمه عريس اتعصب فى وشه وناوله بونيه فى بطنه
او يكون طلق اللى جاي يخطبها
هههههههههههههههه

بس اعتقد ان الامور بتتغير شويه والناس بدات تقدر نوعا ما المأساه اللى بيعيشها اللى بيتقال عليههم شباب امثالنا

وبعدين المشكله اصلا انه بعد ما يدفع اللى وراه واللى قدامه واللى عند الجيران واللى فى جيوب اصحابه ممكن يلاقى المفاجاه
واحده نكديه
تنكد عليه عيشته وتكرهه فى حياته

بس طبعا مش كل البنات كده
الحمد لله لسه فيهم ناس كويسه
ومازال الجواز المؤسسه اللى بتدى هدوء وراحه نفسيه واستقرار حتى ولو حصل شويه خلافات بسيطه او مش بسيطه

وزى ما جه فى القرآن انه موده ورحمه

معلش طولت

جمهورية شومبونجو العربية يقول...

السلام عليكم

ليكى تاج عند الريس

سارعى

الى مقر الرئاسه



رئيس الجمهورية

احساس طفلة محبة للرومانسية بس واقعية يقول...

يساتر يارب
لية كل دا
ما بالطريقة دى محدش هيفكر ولا هيجروء اساسا
وحطة اصفار وارقام وحاجات تخض
قوليلهم من الاخر هيبقى اخر يوم سعيد فى حياتك يوم ما تفكر تتجوز انت وهو
هاهاهاهاهاهاهاهاها
لا معتقدش الحكاية مهولة كدا
يمكن فة مبالغة اينعم
بس بيتحمل ساعات عشان خاطر
الحب الحب والشوق الشوق على رأي اللمبى

دمتى بكل خير
تقبلى مرورى

غير معرف يقول...

شوفى ده يا شيماء كدا

انا الــ Genius اللى عامله

http://img214.imageshack.us/img214/3961/94216735.jpg

ايه رأيك

على فكرة انتى تعرفينى :P

بس مش هقول انا مين ,,, هسيبك لضميرك و قلبك

;)

*البت المشمشية *حلوة بس شقية * يقول...

غير معرف
الصورة مش شغالة
وعموما لو بعت اللينك تانى مش هفتحو
لانى مش عارفه انتا مين
بس خلاص