الجمعة، 24 أبريل 2009

فاصل ونواصل


ياراجل ياست

سامحونى مش هقدر اتواصل معاكو الفترة اللى جاية عشان بعيد عنكو

امتحاناتى خلاص العملى والشفوى والتحريرى خلاص هتبدأ

اقعد جمبكو وبلاش اذاكر يعنى

وخصوصا انى ابيض يا ورد لسه معرفش الالف من صباع الموز فى المنهج بتاعى

مش هقولكم ادعولى

لاكن وانتو بتقروا البوست فى الحظة دى قولو ربنا معاها

يلا قولى

قولى يابت

قول يااااض

هتوحشونى هدخل اشوف تعليقاتكم بس عشان تشجعنى اكتر اتنيل اذاكر فى السنة الكبيسة دى

وان شاء الله اخلص وافضلكو يا حلوين

لااله الا الله

الجمعة، 17 أبريل 2009

للبنات بس 2

أزيكو يا بنات

البوست ده للبنات الىل لسه هتتأهل يعنى هتتجوز
وللستات اللى متجوزة
انا عارفه ان البوست ده فيه ناس عملوه قبلى بس قولت يمكن حد مقرهوش يقراه عندى ودة طبعا غصب عنكو مش كدة ولا ايه

المهم كل الرجالة من غير مطرود من هنا
ومش عايزة بقه الحركات النص كم دى

المهم هنكلم انهاردة يا بنات ازاى تبقى حلوة جوة بيتك

لما بروح عند وحدة متجوزة ولا حاجة

والقيها مثلا امطة الامطة

هههههههههه
يعنى لفة الطرحة فى البيت

ولابسه جلبية مبقعه

ولابسة بنطلون بيجامة كمان تحت الجلبية بقول ايه ده

بقة دى منظر وحدة متجوزة مستنيا جوزها فى البيت
فا الكلام لاى بنت مخطوبة او مش مخطوبة
وللستات المجوزين
فا لازم على الاقل وجوزك جاى من الشغل لما يجى يلاقكى على الاقل لابسة بيجامة نضيفه او قميص لذيذ كدة
وبلاش بقه تقولى هو انا لسه هقوم البس
واتنيل
اة يختى امال لو مكنتيش تتزوقى للمحروس

هتتزوقى لمين

ممكن تلبسى مثلا شورت شكلو جميل كدة وعليه بدى


وسرحى شعرك وحطى عليه توكة حلوة والبسى حلق شكلو لذيذ

ومفيش مانع تحطى روج جاجو وجليتر على شفايفك كدة

ده غلبان ازوقيلو

اشطة كدة

بس ياريت تكونى مستحمية يعنى مش بعد ده كلو


تكونى ريحتك طبيخ وعرق


اشطة كدة

ويايرت شعرك تنزلى اوسة بلاش عفانة وتربطى شعرك كحكة من ورا

انضفو بقه

مليتو البلد

وياريت بقه يا مزة لو مفيش مانع حبتين كلاونيا خمس خمسات

وكترى بلاش بخل ده غلبان

اشطة كدة

خوشى على الاوضة وافرشى السرير

بفرش نضيف
وحطى برفان فى الاوضة ونضفيها كدة

واعمليلو اكل
حتة لو انتى خيبة ومش بتعرفى تتنيلى تتبخى خلى عندك زوق

لو حتة عاملة جبنة على الغدا

ياريت يبقا منظر الطبق نضيف وعالجبنة عليها طماطم ومقطعة العيش كويس

يعنى بلاش غباء حتة فى الاكل
وياريت لو وردة وكوباية ماية جمب الاكل

ده غلبان
يعنى المقصود تخلى عندك زوق يا ولية
وياسلام بقه لو فيه عيد ميلادو
ولا عيد جوازكو

تجيبى شموع من باب الشقة لحجد اوضة النوم
وتوضبى السرير

وتحطى مفرش ليلة الدخلة متخفيش ابقى شلية تانى

ورشى الاوضة برفان



وهاتى ورد وحطية ع السرير على شكل قلب

وظبطى الدنيا كدة

واكتبى ورقه ع المخدة قوليلو فيها مثلا بحبك او اى كلمة حلوة

واعمليلو اكلة حلوة حتة لو هتطلبى بيتزا

اصرفى يختى دى مرة فى السنة

وحطيها ع السفرة وجمبها اى عصير

ووردة وشمع ع السفرة


وطبعا يا مزة لازم تكونى لابسة كويس

اى قميص نوم بيعجب جوزك

وياريت كنوع من انواع التغير تغيرى لون شعرك او القصة

او حتة تعمليه سيشوار


والبسى حاجة حلوة فى رقبتك


وبعد ماتخلصو اكل

ياريت تشغلى اغنيه حلوة سلو

اى حاجة هادية

وخوديه فى حضنك وارقصو سلو وقليلو كلام حلو
او حتة كلمة بحبك
ده غلبان
وبعد كدة مش هقولك تعملى ايه

انتى عارفه ايه هيحصل

طبعا الرجالة ليهم معايا نصيب بس وقت تانى مش دلوقتى

ده لو يحبو يعنى نعمل بوست ليهم يقولو

الاثنين، 13 أبريل 2009

اسف ع الازعاج


اسمك ؟

حاجة غريبة اوى كل المدونين بيقلولى يا شيماء مع انى عمرى ماقولت اسمى لحد

عموما اسمى الاستاذة شيماء

احم احم
- المشهور بيه وسط اصحابك ؟

شيمو- شوشو- مشمشة -شيكو-اوشة-اللمضة-الرغاياواسم تانى بس مش هقولكو عليه

اوعا حد يدلعنى بلاسامى دى اصل انتو حرين هشرحكو




سنك ؟


وانتو مالكو لسه عندى 3 سنين وبسنن


وبعرف اقول بابا وماما وعايزة اعمل اى اح يعنى بى بى


عندى 19 سنة بس اوعا تقولو لحد



- مجال دراستك ؟


بعيد عنكو وعن السامعين وربنا ما يجيب وحش لاى حد


ويبعد عنا وعن السامعين


اداب لغة عربية كارو



- اسم مدونتك ؟


ايه مبتعرفوش تقرو



صورتك الرمزية بتعبر عن ايه ؟


مش بتعبر عن اى حاجة فى الدنيا

- هل فكرت في اغلاق مدونتك ؟ و السبب؟


احيانا بس مش هعمل كدة الا فى حالة واحدة بس


بس مش هقولكو


السر فى علبة الجبنة المثلثات كل لما تشترى اكتر فرصتك فى الفوز تكتر





- أسوء مدونة ؟


اكيد شوفت مدونات وحشة ومنيلة بنيلة غير مدونتى طبعا


وهيا مدونات ناس ميستهالوش انى اكلم عنهم اكيد عرفتو مين




- هيحصل ايه للايميلات
بعد ماتموت ؟



هتموت هيا كمان هخنقها قبل ما اموت واشنقها واغسلها وانشرها


واعصرها هو ايه اللى هيحصلها ايه كل اصحابى مش هيردو يمسحو الاميل كنوع من انواع الذكرى الهباب


وايام العذاب والجرى ورا الكلاب




- اديت الباسورد لحد قبل كده؟


اة عادى معنديش مشكلة


بس اللى بياخدو بيدفع فلوس لانى اميلى مش زى اميل اى حد


كبارات البلد كلهم عليه




- السفر بالنسبة لك ؟


انا بحب اروح اماكن تانية بس المشكلة عندى فى الموصلات


مش بحب السكة الطويلة


بس نفسى اسافر واروح بلاد كتير برة مصر وجوة مصر وتحت اللحاف كمان


المود بتاعك ايه ؟


يعنى ايه مود


ايه الكلام المفشكل ده


اةاة مود يعنى مزاج خدتها فى المدرسة


عادى


مودى دلوقتى كويس


انا بطبعى بحب الضحك واللعب والشقاوة


واحيانا بحب الهدوؤ وانى ابقا لوحدى




- بتعمل ايه في وقت فراغك ؟


اةةةةةةة


بصو بقه


سعات اتفرج ع التلفزيون


واحيانا النت


ولما اكون عندى الحالة ممكن اسرح شعرى واحط ميكب واظبط نفسى


واقعد اتصوربأشكال غريبة وانا فاتحة بؤئى مثلا


وانا ببرق


بس الصور بتطلع خطيرة


ومحدش يطيق يشوفها


- الاكلة المفضلة ؟


بحب حاجات كتير اهمها الحاجات الحلوة والشيبسى والشكولاتة


وبحب الاكل من الشارع


عشان كدة عندى ديدان


وبمموت فى الشاورمة اللحم




الصفات اللي خدتها عن والدك ؟


العقل والرزانة


والعصبية


والتسرع فى الامور


والرحمة


والعطف ع الناس


الصفات اللي خدتها من والدتك ؟


ههههههههههههههههههههه


العصبية


والتسرع فى الحكم ع الاشياء


والزعل بسرعه


والطيبة


وانى عينى عثلى زيها




اكتر 6 حاجات بتكرهم ؟


اللؤم


والغباء


والجشع


واسرائيل


وسعد الصغير


والتخلف


- اكتر 6 حاجات بتحبهم ؟


بحب الاكل مع انى مش تخينة خالص وعايزة معونة من امريكا عشان اتخن


بحب اللى يحبنى


وبحب الضحك


وبحب التكنولوجيا


وبحب الحاجات الحلوة


وبحب مدونتى


والاسماعيلى




- شخصيتك نوعها ايه ؟


مزاجية جدا


عصبية هبلة بيضحك عليا بكلمتين


سريعه الغضب طيبة


بضحك كتير


لماذا دخلت التدوين من الاساس ؟


كدة قلة ادب


دخلت عشان انا بحب الشهرة


هههههههه


لاء بصراحة دخلت عشان قولت ان اعايزة ارخم واقرف فى الناس دى شوية والحمد لله


بأدى رسالتى على اكمل وجه


ولا اية؟




- اجمل كلمة قيلت في وصف مدونتك ؟


كلام كتير بس تقريبا اغلبو مجاملات


بس دايما يقولو مدونة شقيه


ودمها خفيف ودى احسن حاجة مش مهم اكتب حاجة قويةوسياسية


المهم ان تبقا المدونة خفيفة ولذيذة وتروق الناس زى الشاى كدة


- اهمية التعليقات بالنسبة لك ايه ؟


مهمة جداااااا


انا بفضل بعد كل بوست ادخل اشوف الاخبار ايه ومين علق


وبعرف قيمة اللى بكتبو وبعرف مين اللى بيحب يتابعنى


- احلي بوست كتيته و ضع اللينك هنا ؟


ولا بوست


كلو هبل




- افضل مدونة قريتها ؟


مدونتى طبعا


ها ها ها


لاء فيه مدونات كتير ولناس كتير


وتقريبا هما الناس اللى انا ضيفاهم عندى عشان بحب اقرالهم بس مش هقول اسماء ولا سعاد عشان محدش يزعل




- افضل بوست قراته ؟


لاء كتير جدااااااااا


وفيه حاجات بتضحكنى جداا


بس هقول 3 مدونات قبل مدخل التدوين كنت بقراهم عشان كدة قولت لازم اعمل مدونة


تقريبا كل بوستات خيخة وسووو ولماضة




- الشغل بالنسبة لك ايه ؟


بحب اشتغل عشان بدى الشغل حقو اوى ونفسى اعمل حاجات كتير


وكمان الشغل بلنسبالى الفلوس اللى ممكن احقق بيها اللى انا عيزاه




الانترنت بالنسبة لك ايه ؟


مهم جدا


لو النت فصل فى يوم


مش قادرة اقولكو ببقا عاملة ازاى وهقولكو مثال


زى اللى بيشرب مخدارات والجرعه اتأخرت عنو وبقعد اهرش فى شعرى


حد عندو شوية جاز




تمرر التاج ده لمين ؟


مش هديه لحد




سلامزات




كانت معكو الحاجة ام سيد من امام كشك عم عبدو






السبت، 11 أبريل 2009

غطونى وصوتو عليا


الخبر مش جديد

بس الظروف مكنتش تسمحلى اكلم فيه

المهم

الخبر هو عن اسلام نبيه

كتو وكسة

بلاش قلة ادب يابت يا مشمشية ولمى نفسك

انتى فى بلوج محترم

الناس تقول عنك ايه

مس قادرة يا اختشى

لسانى بينأح عليا وعايزة ابعبر بكلام ابيح اوى

بس عيب

كانت قاعدة انا وعم الحاج بابى

ايوة بابى

انتى منين يا بت

المهم سمعت الخبر الفذيع

ان اسلام نبيه هياخد حكم مخفف

اة يا بلد

واللى ميعرفش مين اسلام نبيه ده وايه الحوار اللى بكلم عنو ده

انا هلخصو فى برشامة صغيرة :

اسلام نبيه ظابط فى الشرطة وعامل فيها فرود

حب يتمنظر ويعلم الناس الغلابة الادب

ويوريهم انو مفيش زيو واللى هيكلم هيحط الفيشة فى الكهربا

فحب عمكو اسلام انو يتمنظر على واحد من سواقين الميكروباصات

اللى وقام جابو وقال له انه هخليه فرجه

قام قلعو البنطلون

وجاب عصايا وحطهالو فى ال000000000

طبعا لما يحصل حاجاة زى كدة لازم تقول ايه

عمار يا مصر

المهم عمو الظابط صورو ع الموبيل وشردو خللاه مسخرة

واتحكم على الظابط دة

لحد هنا قولنا عندنا قداء عادل ونزيه

وزى الفل وريحتو اريال

قام رجع واتخفف الحكم على سمسم

وهيطلع براءة


ماهو لو كان واحد هو اللى عمل كدة فى الظابط كان اتعدم

يعنى ايه ياخد حكم مخفف

وينقلوه كمان

لمكان بعيد ويفضل ظابط

يا حلاوة يا ولاد

بلد بتاعه شهادات صحيح

وتلاقيه عندو وسطة

وكان عايش جوة السجن فى نعيم

وكان مدلع

وطبعا قالو انو فرد من الشرطة عمل كدة مش معنى ان جهاز الشرطة كلو تيت يعنى

يا حلاوة يا ولاد ده كل الظباط محدش بيعرف يكلمهم

وفاكرنى اعوذ بلله انهم ربنا فى الارض

اكيد مش كلهم

انا كنت مفروسة اوى من الخبر وحبيت ابعبع معاكو بكلمتين

واقول يبقا انتا اكيد فى مصر


ملحوظة مش صغيرة

انا الحمد لله بقيت كويسة

والمياه رجعت الى المجارى وسدو مناخيركم

وحشتونى

وانا كويسة اطمنو

انا زى القردة الحمد لله

وبجد شكرا على كل الناس اللى سالو عليا

وكانو عايزين يطمنو والتلفزيونات

والمجلات اللى اكلمت عن اختفائى

والاضربات اللى حصلت علشانى

اطمنو انا على دماغكو

وهرخم وابهدل فيكو عشان انا مفترية وقوية

سلامزات بقه

الجمعة، 3 أبريل 2009

يارب قوينى

سامحونى انى مردتش على تعليقاتكم ع البوست اللى فات
بس قريتها كلها
انا كل شوية ادخل اقراها يمكن دى الحاجةالوحيدة اللى بتهون عليا الظروف اللى انا فيها
انا اسفه انى مش هقدر اعلق عندكو الفترة الجاية ولا هنزل بوستات ولا ارود على التعليقات
الحاجة الوحيدة اللى هقدر اعملها انى اقراأ تعليقاتكو
انا عارفه انك بينكو وبين نفسكو هتقولو الحمد لله
خلصنا منها بس انا بحبكو وانتا تقريبا من ضمن الحاجات اللى بتهون ع الواحد
كلكو هتوحشونى
وكل واحد عارف انا بحبو اد ايه
بجد عايزاكو تدعولى
انا بمر بظروف كبيرة عليا
وبقول يارب
قوينى
عشان انا كل يوم بليل بعيط على سريرى ومحدش حاسس بيا
انا معاكو
وهقرا تعليقاتكو ولما ربنا يأذن والظروف تتحل
هحل لتاج اللى جالى
وهرجع زى مانا
بحبكو اوى