حملة التسامح

بكرة ان شاء الله

ان شاء الله هننزل بوست بعنوان

ازاى نسامح بعض

قبل رمضان

ياريت كلو يشارك معانا

وينزل البوست معانا بكرة

بنفس العنوان المشترك دة ازاى نسامح بعض

ونفس الصورة

عايزين نعمل حاجة قبل رمضان

لو حد مش فاهم حاجة يكلمنى علىا لميل

اتقبض عليا ليه انا معملتش حاجة

كنت فى فلسطين وبلأخص فى المسجد الاقصى

وكان معايا ناس كتير اوى جوة

كان فيه قدام المسجد حتة كبيرةواسعة

وكلها زرع وكان فيه 3 جنود اسرائلين فى الناحية التانية الى قدامى واحنا باصين عليهم

قولت للراجل اللى معاه بندقيه فى ايدو

البندقيه دى كانت لما تشاور على الهدف بتدى ضؤ احمر

قولتلو اقتلهم قبل مايجو عندنا

انا بصراحة كنت خايفه اوى

كل لما اشوف جنود اسرائلين

اجرى استخبا تحت اى حاجة

وهبقا هموت فى جلدى خايفه اموت

وبعد كدة لما طلبت منو انو يقتلهم فعلا قتلهم واحد ورا التانى

كان بينشن عليهم بلضؤ الاحمر اللى فى المسدس وكانو بيموتو

فرحنا كلنا

عملنا كلنا فرح جوة المسجد

وكنت فرحانة بلراجل ده اوى ولما جه يحط مسدسه ظهرلى الكاب بتاع الظباط المصريين

الابيض ده اللى عليه نسر

قولتلو اايه ده انتا مصرى

قالى اة قولتلو وانا كمان هو مهتمش اوى

بس انا فرحت

واقعدت اصقف وانط

وبعد كدة قولتلو ممكن البندقيه

امسكها

قالى خوديها

ومسككتها رقصت بيها والناس كلها

عمالة ترقص معايا وبعد شوية كان فيه حارة ضيقه جمب المسجد شوفت فيها جندى اسرائيلى بردو

خوفت تانى

ليجى بلبندقيه علينا

قولت للظابط الحق اقتلو وفعلا قتلو بلبندقيه ام ضؤ احمر اللى معاه

وسبناه مرمى مكانو على الطريق فى الحارة الضيقه

وقعدت ارقص تانى زى الهبلة

بعد شوية المصيبة اللى حصلت ان فى عربيات شكلها غاليه اوى وفيه طبعا اسرائلين بس مدنين شكلهم رايحين حفلة

مشيو فى نفس االحارة اللى فيها الجندى اللى قتلناه اخر واحد والعربية وقفت قدامو

كلهم اتجننو

نزلت ست شعرها اصفر وبيضا وعنيها زرقا الله يحرقها كانت مزة

وقعت تزعق وتقول واحنا طبعا واقفين جوة الجامع

مين اللى عمل كدة حرام عليكو احنا كدة هنخلص

ليه تعملو كدة وكان معاها راجل تانى بكرش وشعرو اسود وشنب كبير اسرائيلى بردو

وواحد تانى بكميرة فديو

قال مين اللى عمل كدة

وبعد الست ام شعر اصفر راحت عربيتها

انا خفت من الراجل ده كنت حاسة انو هيطلع مسدس ويضربنا

فا من خوفى مسكت البندقيه اللى معانا ام ضؤ احمر ونشتها عليه

بس انا والله مش بعرف استخدمها انا خوفت منو بس قولت اهوشو

قام اول مامسكت البندقية قال للراجل اللى معاه ابو فديو صورها عايزة تقتلنا

المسلمة الارهابية وشتمنى ابن الكلب ده واول ما قال كدة رميت البندقيه من ايدى اكنها تهمة

قولتلو

لاء والله

انا مش بعرف اقتل مش انا اللى قتلتو والله العظيم صدقنى انا مش بعرف اقتل اقتلو ليه

بعد دقيقه جه واد مز بردو وطويل

وابيض اوى ولاد الكلب دول مش بيقفو فى الشمس ولا ايه

جبنى من افايا وبقيت انا المتهمة بقتل الجندى الاسرائيلى

قالى تعالى عشان هيحاكموكى

قولتلو والله انا مقتلتوش

المهم قلت للناس اللىمعايا هما كدة هيعدمونى قلولى لاء مش هيعملولك حاجة متخفيش

طلعت كل حاجة فى جيبى ادتهلهم

كان معايا بطاقتى وكروت بتاعه محلات كدة بس مش عارفه هيا ايه

قولتلهم خليها معاكو ومشيت مع الواد المز

قولتلو هو انا ممكن اكلمك بصراحة قالى ايه

قولتلو والله العظيم وكتاب الله ماقتلتو صدقنى بلله عليك

عارف البنت الحلوة اللى جت من شوية انا قولتلها كدة وصدقتنى

قالى ليه عملتوكدة احناكدة هنخلص

قلتلو منتو بتقتلو فينا كل يوم كتير وعادى

قالى انتو بتخلفو كتير

لاكن احنا هنخلص حرام عليكو

قلتلو والله العظيم انا مش بعرف اقتل انا مقدرش اقتلو

انتا فعلا عندكو حق انتو كدة هتخلصو قالى على فكرة المزة ام شعر اصفر دى خطبتى

قولتلو والله

دى امورة اوى عرفت تنقى

هو انتو هتعملو فياايه بقه

اقف جمبى

انا مش بعرف اقتل

قولهم كدة فى المحكمة

انا عايزة ارجع مصر والله

وهفهمهم هناك انكو ملكوش ذنب فى اى حاجة ومش هنقتلكو عشان متخلصوش

ورحنا المحكمة وفضلت اقول انا مقتلتوش

وكان جوايا خوف كبير منهم

بس لسة متحكمش عليا

**************************************

اللى بقولو ده حلم لسه حلماه انهاردة

واقول ماصحيت من النوم قولت اجى احكيه ليكم

انا مش عارفه انا كنت جبانة كدة ليه فى الحلم

انا كنت خايفه اموت اوى

انا كنت خايفه منهم اوى

مش مشاعرى لما كنت فى مصر معاهم وانى ممكن اروح افجر نفسى واقلب الدنيا

هوانا جبانة اوى كدة انا مش مصدقة نفسى

ومستغربة

انا جبانة

انا جبـــــــــــــــــــــــــــــــــــــــــــانة

بجد محدش يتريق عليا

النتيجة

نجحت
تقديرى جيد مرتفع

صبايا والشذوذ الجنس

تحديث
***************
http://arabic.cnn.com/2009/middle_east/7/12/blog.12july/index.html
السى ان ان الشرق الاوسط كتبت عن البوست بتاعى
شكرا لمحمد مدونة دماغى لولاه مكنتش هعرف ان حد كتب عنى فى التاريخ ها ها ها


ازيكو



عاملين ايه اناكويسةالحمد لله اطمنو



وشكرا لكل الناس اللى بتسال عليا دايما

***************************

انهاردة هكلم عن الحلقه اللى استضافت فيه ريهام سعيد مذيعه برنامج صبايا على قناة المحور

بنات شواذ جنسيا

اولا هكلم عن مضمون الحلقه

ان ريهام اتكلمت مع البنات

اللى طبعا شكلهم متاجرين من شارع الهرم ب200 جنيه عشان يقولو الكلام ده

لان مفيش بنت مهما كانت منحرفة

انها تطلع ع التلفزيون

وتقول انا بعمل سيكو سيكو مع بنت خالتى

ليه يعنى

اهلهم مش هيعرفو صوتهم

شكلهم للدرجادى مش واضح

طبعا كل ده تخاريف

انا مقتنعتش بلحلقة

وكنت مكسوفة جدا

وهيا شغالة

عشان ماما كانت موجودة وطلبت منها انها تغير القناة

بس بعد كدة شوفتها لوحدى

ههههههههههههههه

بس عشان اعرف والله ازاى بنتين بنات خالة يطلعو يقولو احنا شواذ جنسيا

وبنسمتع بكدة مع بعض

ازاى يعنى

ازاى قناة زى المحور

ومذيعه مصرية مسلمة زى دى

تعمل حلقة عن الشواذ

مفيش مانع انك تعملى حلقه عشان توعى الناس

مش حلقة تجيبى بنات يقولو احنا كنا بنعمل ايه مع بعض

وعلاقاتهم بلرجالة وبلتفاصيل

لاء وايه

ريهام تقول البنات كانو محجبات

وقلعتهم الطرح عشان كدة بيسئو للاسلام

لاء يا هانم

الاسلام عمرو مكان طرحة

اة طبعا

الحجاب امر من ربنا بس مش معنا كدة تقلعيهم الطرحة

وبعدين اللى ربنا سترو انتى متفضحوش

وبعدين كنتى ممكن تكلمى بـأسلوب كويس عن الموضوع

عن الاضرار وتجيبى شيخ يكلم فى الدين

يعنى ايه الكلام ده

زى مابتلاقى فيلم

من اولو بوس واحضان وقلة ادب وكلام اباحى

وفى اخر خمس دقايق من الفيلم قال ايه بقه يقولك ان كدة غلطوالبطل بقه ربنا هداه فى اخر خمس دقايق

ما المشكلة ان الشباب والاطفال مش بيتعلمو من ده

بلعكس

دول بيقلدو

اة والله

وبيتعلمو كلام اباحى جديد

وقلة ادب على اللى عندهم

وبيثيرهم ويكتر من شهوتهم

ايه القرف اللى بقينا فيه دده

كنا بنقول ان البرامج بقت الحاجاة والوحيدة اللى بعيد عن الاباحية وقلة الادب

وكان الواحد مش بيتكسف وهو بيتفرج لاكن دلوقتى

بقت البرامج بيكتبو عليها للكبار فقط

يا دى الهباب والزوفت والاطران

نلغى التلفزيونات

بقيت اخاف اتفرج ع التلفزيون وحد معايا

لكلمة تتقال ولا مشهد نشوفو

يسبب احراج للى موجودين معايا

انا مش بقتنع بلبرنامج

اللى قال ايه بيعرض المشكلة عشان الناس تاخد بالها

بكلام يتقال يجرح المشاهد ممكن تعرضى موضوعك

لان لحد دلوقتى فيه ناس كتير اوى متعرفش ان فيه شذوذ جنسى ولا تعرف يعنى ايه معناه

لما تجيبى بنات

تقول احنا بنام مع بعض

وبنعمل سيكو سيكو

وبنشوف كذا عن النت وبنعمل ونسوى

لو واحد مش فاهم هيجرب ويعمل

وتبقى انتى بوظتى الدنيا اكتر من انك تصلحى

اسلوبك رخيص بصراحة للحصول ع الشهرة

او انك تعملى فيها مذيعه جامدة

وبتعمل مواضيع جريئة

كنتى بتعجبينى فى الاؤل

بس كلمة حق تتقال الحالات الانسانية الى بتعرضيها بجد

عشان تلمى للناس دى فلوس عشان مرضهم

يغفرلك كل الحاجات دى

*************************

ههههه


انا جد اوى فى البوست ده محدش يتعود منى على كدة اة انا بقولكو اهو


انا مش كدة خالص


حد معاه جنيه

مصر مش كدة

عمرو اديب عايزة اقولك حاجة مهمة عيب عليك

ده انتا مصرى

تشهر بمنتخب مصر قدام العالم كلو

وبتكلم بسخرية على الجهاز الفنى وعلى منتخب مصر

احنا فعلا لعبنا وحش

قدام متش امريكا

ونستاهل الخسارة اوى كمان

بس بردو

مش معنى اننا وقعنا

اننا مش هنقوم تانى

متش الجزائر اتغلبنا

وقومنا من تانى

لعبنا وبقينا افضل

وكل الصحف العالمية اتكلمت عنا

عيب عليك

وانا بتفرج على البرنامج

مش هقدر اقول الاسلوب عامل ازاى

يعنى لما االاعبين يتسرقو

وممكن نقول ان التهمة دى اتلفقت ليهم

عشان سمعه بلد بتضم كاس العالم

تقوم تقول ان المنتخب عمل كدة

لاء طبعا

وانا متاكدة ان كل المصريين اللى بيفهمو بجد

بيقولو كدة دلوقتى

احنا اللاعبية بتاعتنا محترمة

وعمرهم مايغامرو بأسم مصر

ةالبطولة والهدف اللى جايين عشانو

عشان مجرد نزوة

عمرو اديب زى مايكون عايز جنازة وتشبع فيها لطم

انتا خليت اللى ميعرفش يعرف

اتكتب على النت

اتكتب فى الصحف

لاكن مش نطلع نشتم فى بعض

وتجيب فنانين

يشتمو على الاعيبة

عيب كدة

احنا عايزين نطلع بأفضل صورة

احنا لو اخلاقنا كدة فعلا

منستحقش نطلع كاس ابو زعبل مش كاس اوربا

ولما زيدان كلمك وشحاتة وابو تريكة واحمد حسن

بيشرحو الموقف

بقيت تسخر من كلامهم

زى متكون مش عايز تصدق الحقيقه اللى بتسمعها

عايز تصدق انهم نجاسة

فعلا

انا من هنا

بأسم كل المدونين

وانا عارفه انهم معايا دلوقتى

احنا بلد محترمة

وفيها اكيد حاجات وحشة

زى ما موجود فى كل مكان

بس بنحب بلدنا وبنحترمها

ونحافظ عليها

مش نطلع ع التلفزيونات

ننشر غسلنا اذا كان تيت على الناس

بلاش اسلوب التهكم والسخرية بتاعك ده

اسلوب ردئ جداعشان تعمل للبرنامج بتاعك حصريات

ربنا مع منتخب مصر

ولو كان فى حد غلط هياخد عقابو

عايز مراتك تحبك

تحديث

مصر فازت على ايطاليا بجون حمص الاسمعلاوى
بجد ان امبسوطة اوى

بس الحكم ابن التييت من كتر ماهو متغاظ ادى الحضرى انذااار

عشان شال بلاوووووووى

يلا مبررروك لينا

ازيكو يا معلمين

عاملين ايه

طبعا تفتكرو معايا البوست اللى فاتت عن البنات بس

واللى كتبت فيه ازاى الحجة تهتم بفوزى جوزها

انهاردة هكلم عن فوزى وازاى يدلع عنيايات مراتو ويهشتكها

بص ياعم الكتكوت

اولا الست اللى فى البيت دى ليها حق عليك

وهتتحاسب عليها

هتقولى مراتى وحشة وريحتها وحشة ومش بتهتم بنفسها

هقولك غيرها انتا

اطلب منها الحاجة اللى نفسك فيها

وحاول معاها انك تغيرها

قولها كلمة حلوة

حسسها انها مرغوب فيها

وانك بتحبها حتى لو شبه خالتك نبوية

وعشان تبدا بكدة

لازم تبدأ بلكلمة الحلوة

ده انتا لو هتقولها قبل ماتنزل الصبح بحبك

متتخيلش الستات هبلة اد ايه

وهتبقا نفسيتها فى السما

وهتلاقيها طول النهار

مرزوعه قدام المرايا عمالة تسلك فى شعرها وتحط كيلو جاز وتموت القمل

اة مستغربوش

بجد

وانت انازل قولها كلمة حلوة

قولها انا هاجى بعد الشغل جرى اقعد معاكى

ابعتلها مسج ع الموبيل

قولها وحشتينى

هستنا اخلص الشغل عشان اشوفك

اعزمها مرة فى الاسبوع برة

مش لازم فى مكان شيك اوى

بس اقل حاجة

لو هتتمشو على الككورنيش وتجيبلها بربع جنيه لب

وكوز درة بجنيه

وحبة مفشر بنص جنيه

يالهوى

يبقا انتا كدة يا معلم تمام التمام

وهتبقا كسبت فيها صواب

قولها انا عمرى ما هشوف واحدة احلا منك

انتى شكلك عجبنى وجسمك وشعرك

كل الكلام ده هيرفع من معنوياتها

بس يا عم الكتكوت

لازم انتا كمان تهتم بنفسك

مش مطلوب من الست تبقا حلوة وانتا تبقا خردة مينفعش

احلق شعرك كدة وظبطو

حط برفان حلو

البس بيجامة نضيفه مكوية مش مكرمشة زى مايكون دايس عليها اتوبيس

خدها واتفرجو على التلفزيون سوا

العبو سوا

اى حركات كدة

والله الستات هبلة بيضحك عليها

حاول تشاركها فى اى حاجة بتحبها

قولها اكلك حلو

هتلها وانت اجاى من برة اى حاجة

لو باكو لبان حتة

تحسسها انك فاكرها

الستات هبلة بيضحك عليها

مفيش مانع تهتم بجسمك شوية

وتلعب شوية تمارين

او تروح جم

وبلاش عفانة وكوزين الاسمنت اللى انتا بتلعب بيهم دول

والله الستات هبلة بيضحك عليهم

ابعتها يوم عند امها

واعملها عشا رومانسى كدة

احنا عارفين انك عكاك ومش بتعرف تعمل بيضة

هات اى اكل من برة

مش مهم اكل

اعمل عصير

اى حاجة

وروقلها البيت

عشان لما تيجى متتعبش فى حاجة خدها فى حضنك كدة وانتا بتوصف فى جمالها

ورقتها حتة لو مراتك وحشة صدقنى هتبتدى تهتم بنفسها

الكلام الحلو ده هو االمفتاح السحرى

والله الستات هبلة بيضحك عليهم

وانتا يخوية مراتك دى حلالك

حيبها

وحاول تشوف اى حاجة فيها كويسة

ولو حياتك وحشة غير فيها

لان لو بصيت برة هيبقا حرام عليك

اكسب حلالك

وعيش مرتاح

وبكدة نكون وصلنا لنهاية حلقتنا سلام

وحشتونى وحشتونى وحشتونى

لو اقولكو وحشتونى اد ايه

مش هتصدقو

انا بكلم بجد

حسيت بجد انكو عيلتى

واصحابى واخواتى

بنهزر ونسلى ونتعلم من بعض

انا كنت فى فترة امتحانات

وتقريبا الفترة دى حصلت ليا مشاكل وظروف قاسية جداا

بس بحاول اخرج نفسى منها معاكو

انا رجعت تانى

وهرجع اتشاقى معاكو

استعدو بقه للرخامة بتاعتى من تانى

وعايزين نرجع تانى زى الاؤل واحسن وياريت

اللى يجيى يجيب بقه لب وترمس وشيبسى لزوم بقه للعب بقه والشقاوة

انا هنزل المرة الجاية ببوست حلو يمكن يعجبكو

شكرا لكل اللى سأل عليا

وكان بيسال عليا دايما

مع ان كان فى ناس متوقعه منها انها تسال عنى

بس مسالتش

وفيه ناس كاانت بتدخل كل شوية تسال عليا

وتسال عنى وعن الامتحانات

بجد احرجتونى بزوقكو

انتو ناس طيبة

وانا مش هسكتلكو

لازم ابهدلكو

اشوفكو فى الحلقة الجاية مع تحيات المفتش كرومبو