الجمعة، 21 مايو، 2010

اه يا وجع قلبى



إليكم هذا الحوار .....

أنا : أسمك بالكامل


هو : مش عــــــــــــارف
----------------------------------------------------------------------------------





انا : عنــــوانـــك


هو : اى رصــــــيف فى الشارع
----------------------------------------------------------------------------------

انا : نوعــــك



هو : ولد أو بنت مش هتفرق كلنا بنتعامل نفس المعاملة
---------------------------------------------------------------------------------
أنا : اسـم أبــــــوك .... ؟

هو : ممكن يكون أى واحد ابنه تـــــاه أو أتــــخطف




---------------------------------------------------------------------------------



أنا : طيب أمــــــك ...



هو : ممكن تكون واحدة غلطــــت .. وخـــافت .. فرمـــتنى
-------------------------------------------------------------------------------




أنا : مين أصــحابك ....


هو : بلية و اللمبى و حنتيرة ... اللى أنت شايفهم فى الصورة ديه
أنا : هما بيعملوا أيه فى الصورة ديه هو : ديه قعدة كلة و سجاير .. بنشمها علشان منتوجعش و ننسى همومنا


--------------------------------------------------------------------------






أنا : فيه حد بيساعـــدك ... ؟ هو : لأ .. قليل قوى ... أنا بشوف الأعلانات و الحملات علشان الأيتـــام .... بس ناسيين أطفال الشوارع ... هو احـنا مـش أيتام برده ...
-----------------------------------------------------------------------------







أنا : طيب رمضان داخل و أكيد فيه خير كتير بيجلكمهو : والله الناس بتــطردنا من موائد الرحمن ..... بيــقرفوا مننا .. هو مش المفروض الاكل ده لينا .. ولا علشان العمال و أصحاب المحلات و الناس اللى مش بيلحقوا يروحوا بيتهم
أنا : حسبى الله ونعم الوكيل
--------------------------------------------------------------------------------







ملحوظة : نقلاً عن جريدة الأخبار .... مصر تستورد بـ 150 مليون جنيه أكل قطط و كلاب ... سأتحدث عن مصر فقط منعاً للحساسية ... فهى وطنى و أنا اعاتبه انا :بس أنت طفل شارع فى منطقة راقية زى ديه .. أكيد الأغنياء هنا بيساعدوكم هو : (بيضحك ) أنا : بتضحك ليه .. هو : أصلى بشوف الناس هنا بيشتروا علب اكل للقطط و الكلاب بتاعتهم ..... والله علب شكلها حلو قوى ... يعنى لو حد منهم أدهالى مش هقول لأ ..
---------------------------------------------------------------------------------







أنا : طيب بتاكل منين ..؟ هو : الحمد لله .. مش بحسبها ... وزى ما حضرتك قلت فى الموضوع الأولانى أن الزبالة فيها وجبات كفاية لينا
--------------------------------------------------------------------------------







أنا : طيب كويس انك بتاكل ...فين ناس فى أماكن تانية بتموت من المجاعات هو : هما بيموتوا مرة واحدة .... أحنا بنشوف الموت بعنينا كل يوم ...
-------------------------------------------------------------------------------







انا : نفسك تطلع أيه .. ؟ هو : انا مليش أختيارات ... أنا مصيرى معروف
------------------------------------------------------------------------------







انا : ايه أكتر حاجة لما تسمعها بضيقك ....


هو : لما بسمع عن فلوس الســينما انا : فلوس أيه ... قصدك أيــــرادات الأفــلام .... هو : اه .. اصل الواد حنتيرة بيعرف يقرا .. وبيقولنا أن الفيلم بيعمل فى الأسبوع بتاع 10 مليون جنية ......... ده الرقم ده يحل مشكلة أطفال الشوارع كلها أنا : يااااااااااااااااااااااااااااااااااااه .. ده انت فيلسوف .. أزاى ماجاش فى بالى الموضوع ده
------------------------------------------------------------------------------




أنا : أيه أكتر مشهد بتشوفه بيوجعك ...


هو : لما بشوف أب ماسك أيد أبنه ... ولما الناس بتطلع بأكياس كتير مش قادرة تشيلها من السوبر ماركت .....لما أشوف زحمة العيد والناس بتشترى هدوم لولادها ....لما الشتا والمطر ينزل والناس بتجرى على بيوتها بس أنا مبعرفش أجــــــــرى فين ولما ............................................. أنا : (قاطعته ..) كفاية كفاية والله وجعت قلبى
--------------------------------------------------------------------------------







أنا : طيب نساعدك أزاى .. تاخد فلوس ؟


هو : لأ .. لأ ... لأ أنا : مالك فيه ايه هو : الناس فاكرة انها بتدينا أحنا ......... الفلوس ديه بيلمها منا بلطجى ..... وكل منطقة ليها واحد مسيطر عليها
-----------------------------------------------------------------------------







أنا : طيب تحب اى حد يقرأ المووضوع ده يساعدوك أزاى ... أن هوصل صوتك ليهم


هو : يساعدونا بأى حاجة نـــاكلها ... لقمة نضيفة وخلاص يساعدونا بأى لبـــس قــديم عند ولادهم ... يستر جسمنايساعدونا ببطــــانية مقطــــعة علشان الشتا يساعدونا بفلوس بس مش كتير حاجة بسيطة قوى ... علشان البلطجية بيضربونا لو مجبناش إيراد يساعدونا بدعوة من قلبهــــــــــــم
--------------------------------------------------------------------------------







وجدته يتوقف عن الكلام و دموعه تلمع فى عينيه ...
أنا : مال فيه إيه ... هو : ..................


------------------------------------------------------------------------------




اختنق صوته وتكلمت دموعه ...... بكى و انتفض جسده الصغير يااااااااااااااااااااااااااااااااااااااااااااالله
عجزت عن التماسك وأنهرت باكيا احتضنته بكل قوة (تناسيت رائحته المقززة .. والأوساخ التى تعلو جسده ) .....
بكينــــــــــــــــــــــــــا معا .... وأصدر هدير بكائنا لـــــحن الألم وقسوة البشر
أنتهى الحوار ولم تنتهى المأساة
أطفال الشوارع لن أنساكم و لن تموت قضيتكم
أنا لا أريد حملة .. لأن الحملة سيأتى وقت لها وتنتهى أريد رسالة أحفرها فى القلوب من فضلك شاركنى الرســــــالة أذا كنت مدونا بكلمة ... وان لم تجد تعليق ... من فضلك أكتب (أطفال الشوارع لن أنساكم و لن تموت قضيتكم ) حتى لا تموت الرسالة وسط باقى المواضيع ...

*******************************

بجد وحشتونى اوى انا الفترة دى كلها مكنش ليا نفس اكتب حاجة وادعولى عندى امتحانات

والمواد صعبة ربنا يوقف نموهم

خلص الكلام *

هناك 16 تعليقًا:

mohamed ghalia يقول...

اقول ايه
انا كمان هقول اه ياوجع قلببببى

م/محمود فوزى يقول...

السلام عليكم
ازيك
ايه الموضوع الصعب ده
بس انتى عارفه موضوع مهم جدا
دي مسئوليه الحكومه والمجتمع
والناس لازم تعمل حاجه
الاطفال دي ملهموش ذنب يبقوا فى الشارع
ممكن يكونوا فعلا تايهين
ولكن برضه ممكن يكونوا من اب وام عندهم مشكله فى الضمير

لازم انقاذ الاطفال دي قبل مايبقوا مشاريع مجرمين ناقمين على المجتمع
هم مش حاسين بالانتماء ليه

بس فعلا منظرهم يبكى

وبعدين موضوع البلطجي اللى بياخذ منهم الفلوس
مش المفروض فيه حكومه ولا الحكومه تهتم بالامن السياسي اهم من الجنائى
وكمان للاسف بيبقى فيه بلاوى فى موضوع اطفال الشوارع ممكن توصل للاغتصاب
حسبنا الله ونعم الوكيل

ربنا يكرمك ويوفقك

قلم رصاص يقول...

لاحول ولاقوة الا بالله
حاجة بجد توجع القلب

منها لله الحكومه ومنهم لله القادرين على حل مثل هذه الظواهر على مصر

وفعلا اكل الكلاب والقطط الخاصه باولاد الهاي كلاس تكفي لحل هذه المشكله

______

حمدلله على السلامه

وربنا معاكِ في الامتحانات وبالتوفيق دايما

تقبلي مروري وتحيتي

adel يقول...

انا بقالي شهرين او زيادة مبعلقش عند حد
وبحاول واحدة واحدة اتعامل
بس زي ما انتي من اول ناس عرفتهم
هاكون اول حد ارجع اعلق عنده و الصدفة ننزل بوستين في نفس اليوم

--------------
بالنسبة لبوستك
فانتي عارفة حلم العمر
وحتي في السينما نفسي اعمل الحالة دي بشكل غريب جدا ... بس ربنا يديني بجد
وعشان ميبقاش كلام يتقال و بس
انا مش هاقول هاعمل ايه
ربنا يقدرني و بس

لك شوقة ياعم بخ
طمنيني عليكي

فاتيما يقول...

كدا يا قطة يا مشمشية ؟؟


يعنى بوم ما ترجعى بألف سلامة
ترجعى بالبوست
اللى يوجع القلب دا



اقولك ايه بس ؟؟



البوست رائع
و موجع
و تسلمى


و انتى وحشتينا
و حمدلله على سلامتك

*البت المشمشية *حلوة بس شقية * يقول...

محمد
شكرا لمرورك


محمد فوزى

بجد عندك حق هو اصلا مفيش ضمير


قلم رصاص
منهم لله للى يقدرو يحلو المشكلة دى ومش بيحبوها



عادل
ازيك يا عم بخ
ان اكمان مش بعلق ابدا عند حد وانتا كنت اول واحد ادخل عندو انهاردة واعلق عندو
ويارب حلممك اللى بتحلو بجد تقدر تعملو


فاتيما وحشتينى يا قمر

واثقة بربها يقول...

السلام عليكم
نعرفى ان قلبى وجعنى قوى
بشوفهم فى الشارع مش عارفه اعمل لهم ايه ؟؟ بجد حالهم صعب و اصعب من الايتام

ربنا يوفقك فى الامتحانات

Hesham يقول...

اولا مرحبا بعودتك متهيألى بقالككتير مش بتكتبى بس بجد اصدار يوجع القلب ويضرب قلما كبيرا على وجهنا جميعا

AHMED SAMIR يقول...

اولا: فكرةعرض الموضوع اكثر من رائعة
عرضتيها بشكل رائع بجد\
ثانيا بقى انتي فين من زمان
و فين تعليقاتك ومشاركاتك
ينفع كدة؟؟
عموما
حمدا لله على السلامة و عود احمد

احاسيس آيوشه يقول...

ازيك ياشمشمة
ايه يابنتى البوست دا بجد يوجع القلب
بس جزاكى الله خيرا الموضوع دا مش لازم يبقى حملة لوقت محدد
دى لازم يبقى واقفة والناس كلها تعرف معاناة الاطفال دول بجد

فكرة من الزمن ده يقول...

وجعتي قلبي
يارب تنجح ياتتح

لجين أبو الدهب يقول...

لا حول ولا قوة الا بالله

بجد حاجة توجع القلب

لو جمعوا 3 مليون هانقول متوسطين الحال وجمعوا من كل واحد بس جنيه واحد

هاتتحل مشاكل ناس كتير بجد

جزاكِ الله خير على الرسالة

وربنا يوفقك فى الامتحانات ياااارب ..

شوكولاتة يقول...

آآآآآآآآآآآآآآآه ياقلبي

وحشتينا يا مشمشية
ويارب تنجح يا حمادة وتاخد الشهادة

بنت الإسلام يقول...

حسبي الله ونعم الوكيل

(أطفال الشوارع لن أنساكم و لن تموت قضيتكم )

Sameh Ezzat - (خواطر خاطر) يقول...

اولا بقولولك حمدلله علي السلامه ليه
ما انتي اختفيتي تاني اهوو وبدون اي اسباب..! عموماربنا يطمنا عليكي يا شيموو..
بخصوص البوست المؤلم ده فانا مش عارف اقول ايه بصراحه..
الرسول عليه الصلاه والسلام قال..
( كلكم راع وكلكم مسؤول عن رعيته )

المفروض انهم مسؤليه البلد يعني دول اطفال ملهمش ذنب ان ابويهم اخطأو

المفروض الحكومه توفر لهم الامان الحقيقي مش تخدهم الاحداث ويطلعو اكثر عدوانا للناس

kareenaa kapoor يقول...

الموضوع أثر فيا جدا
بطريقة سردك المبسطة

ربنا يقدر كل واحد حابب يساعد
انه يعمل حاجة فعلا