الأحد، 14 فبراير 2010

يعنى ايه كلمة وطن


يعنى ايه كلمة ووطن

السؤال ده اتكرر فى بالى كتير اوى الفترة الاخيرة

يعنى ايه وطن

يعنى ايه مصر

يعنى بحب بلدى اوى

مصر مش بس الكورة

احنا بنحاول ندور على حاجة نحبها بيها

بندارى كل حاجة وحشة فيها بلاغانى والكورة

بس مش هيا دى مصر

لما بنزل فى لاشارع يوم المتش

والاقى كل الناس فى الشارع

بتغنى وترقص من قلبها وشارين العلم ابو عشرن جنيه

بستغرب

معقول

هما دول نفس الناس اللى بيقعدو يشتمو ويلعنو طول الوقت على البلد

وعلى اللى فيها

ايه المفارقه العجيبة دى

لما بتمشى فى الشارع

ومتخيل ان الزبالة دى موجودة بس فى مصر بتقعد تلعن ام البلد

بس فى الاخر بنحبها

لو سافرت برة

صدقنى هتبقا نفسك تشوف الزبالة دى

نفسك تشوف العيال اللى مرسوم على وشها الشقا

نفسك تشوف الراجل اللى

طالع بفنلتو من البلكونة وعمال يشتم العيال اللى بتلعب كورة

الوطن دة ليه معانى كتير اوى

مش شرط

يكون الحاجات الحلوة اللى فيها

لاء والوحشة كمان

السؤال هنا؟ يعنى ايه كلمة وطن بنسبالك

وايه اكتر اغنيه وطنيه بتعبر عنك

بس خلاص

******************************

شوية حاجات

وحشتونى جدا جدا جدا

جدااااااااااااااااااا

شكرا للناس اللى بتسال

مبروك يا مايكل ككتابك الجديد

شكرا يا عادل يا جماعه هو اللى كتبلى بوست عيد ميلادى

انا معاكو بس كان عندى ظروف مبدخلش

يلا سلاموووووووز

هناك 32 تعليقًا:

AHMED SAMIR يقول...

اولا الف الف حمدا لله على السلامة يا فندم
غبتي و العود احمد
ثانيا
انتي جيتي ع الوجيعة تماما.....مايحسش بالالام الوطن الا من افتقده
و هو ما انا فيه حاليا
في البعد عن الوطن يصبح كل ما تفتقديه في الوطن هو الوطن
بمعنى ان الاهل هم الوطن و الاصحاب و منزل هو الوطن
اي حاجة توحشك في مصر و انتي بعيد عنها هي الوطن
بالنسبة للأغنيات الوطنية......في الغربة تصبح اي اغنية عن مصر هي الاغنية المفضلة

شاب فقرى يقول...

كل اللى قلتيه دا
بيوضح اننا شعب فقرى بيحب الزبالة والصداع
اوضحلك بشكل تانى
الاحداث اللى بتحصل حوالينا
زبالة وغرق العبارة والفساد واى حاجة وحشة ليها ذكرى جوانا
سابت أثر جمب كل حاجة حلوة
فإتربط الحلو بالوحش فى الذاكرة
بقينا بنحب البلد فى الحاجات الوحشة دى
لو سافرنا يبقى نفسنا فى صندوق زبالة وعيال على وشها الشقا ويبقى نفس الواحد يشوف الدبان

يبقى نفسه يقعد فى البلكونة بالفانلة ويشرب الشاى العصر و يطلع جاره يقفل الشباك فى وشه
القط ميحبش الا خناقه
هما الاجانب برده بيحبه وطنهم لانه منظم وهادى وبيعرفوا يشتغلوا ويحققوا ذاتهم وبيعرفوا يرتاحوا
عيشه فرديه بحته
احنا بقى متعودين على قعدة المصطبه
فمهما سافرنا نرجع نحب بلدنا تانى وتالت
الكلام بقى واضح زى الشمس اهوه
معنى الوطن عندى
مصر
بكل ما فيها
بكل ناسها
الحلو اوى
والوحش اوى
نهر النيل وكل ترعة
حتى الفلاحين وشوارعهم وافكارهم
كل حاجة كل حاجة كل حاجة
والكورة دى بقى
الناس بتحبها ليه
الناس شايفه ان البلاد العظمى اللى لعيبتها بالملايين بتلعب كورة كويس هما بقى نفسهم يحسوا ان بلدهم ناجحة وعندها فريق تمام من اولادها مش من البلاد التانية
نفسهم يشوفوا البلد بتنجح والعالم كله بيعترف بالنجاح دا
بس كدا
كل سنة وانتى طيبة
وبعدين ما انا قلت لك عالفيس بوك
يالهوى عليكى
دا التعليق التانى
بكتب فيه بقالى ربع ساعة
اشطة
فقرى

Unknown يقول...

اللى بيشتمها دا هو اللى بيحبها ولان اللى مابيحبهاش مش فرقة معه

adel يقول...

مش معلق بقي عندك !!!!
ايه عادل و بوست عيد ميلادي ده ؟؟

----
علقت عندي بس برضه
افاتار نفسه فيلم مسروق و منقول منن فيلمين كارتون لديزني
بوكاهانتش و اطلانتس :)

romansy يقول...

الف الف مليون حمد الله على السلامه
يا قمر
كل سنه وانتى طيبه
عيد حب سعيد عليكى
ايه الغيبه الطويله دى
وبعدين رجعلنا بوست عن الوطن
صحيح احنا نفسنا نعرف يعنى ايه كلمه وطن
دلوقتى الوطن اتقاس بماتش كوره
بس برضه مننكرش اننا نحب مصر قوى

*البت المشمشية *حلوة بس شقية * يقول...

احمد

عندك حق يا احمد
ميحس بلوطن غير اللى بعد عنو

*البت المشمشية *حلوة بس شقية * يقول...

شاب فقرى
هههههههههههههههههههه
حتى تعليقاتك يا كريم
طويلة

عجبنى اوى لما بتقول بيبقا نفسو يشوف الزبالة والدبان

*البت المشمشية *حلوة بس شقية * يقول...

شاب فقرى
هههههههههههههههههههه
حتى تعليقاتك يا كريم
طويلة

عجبنى اوى لما بتقول بيبقا نفسو يشوف الزبالة والدبان

*البت المشمشية *حلوة بس شقية * يقول...

شاب فقرى
هههههههههههههههههههه
حتى تعليقاتك يا كريم
طويلة

عجبنى اوى لما بتقول بيبقا نفسو يشوف الزبالة والدبان

*البت المشمشية *حلوة بس شقية * يقول...

العيسوى الصغير
واحنا طبعا كلنا بنشتمها

*البت المشمشية *حلوة بس شقية * يقول...

عادل
مالك بس يا دولا
داخل افش عليا كدة ليه

*البت المشمشية *حلوة بس شقية * يقول...

عادل
مالك بس يا دولا
داخل افش عليا كدة ليه

*البت المشمشية *حلوة بس شقية * يقول...

احمد رومنسى
عندك حق يا احمد

*البت المشمشية *حلوة بس شقية * يقول...

احمد رومنسى
عندك حق يا احمد

خواطر شابة يقول...

الوطن أم الوطن جزء منا ساكن فينا لو خرجنا منه لايخرج منا الوطن أرض وناس وذكريات الوطن لايعوض ولاينسى حتى عندما ننتقده او نلعنه لايكون هذا لاننا لانحبه وانما لاننا نعشقه ونتمنى أن يكون خير البلدان
تحياتي لك

MaNoOoSh يقول...

الوطن هو اللى راح واللي جاي وشوية اللون الأسود اللي بينهم

مي يقول...

الف حمد الله على سلامتك اولا وبجد بجد وحشتينا اوى
الوطن كلمة جميلة وكبيرة اوى بس مش بالكلام بنعبر عنها لا بالافعال يمكن ساعات بيكون جوانا خوف وحزن وغضب بس فى الاخر بنتجمع حوليه وبنحب ووطنا جدا ويمكن اللى فى الغربة بيحسها اكتر

وحشتينى جدااا

عايش... ولكن !!!! يقول...

الف حمدلله ع السلامه اولا

ثانيا موضوع الوطن
فانتى فكرتينى بأغنيه قديمه جدااا كنت بسمعها زماااااااااان
اسمها الغربه
لاسماعيل البلبيسى
حقيقى محدش بيعرف قيمة كل حاجه الا لما تروح منه
علشان كده محدش بيحس بقيمته قد المغتربين

sony2000 يقول...

انا اول مره اعلق هنا وباذن الله موش اخر مره
احنا كدا وطبيعتنا كدا
تقريبا غير كل الشعوب مهما روحنا وجينا
تلاقيبره المصريين بيقولو نفسنا نرجع حتي لو كانت ايييه
انا اللي نفسي اعرفه احنا ليه كدا واقصد لما بنبعد بنفتكرها ونحن ليها حتي واحنا جواها والموضوع دا موش موجود عند اي شعب تاني

mohamed ghalia يقول...

حمدا لله على سلامتك المدونة نورت من تانى

Tamer Moghazy يقول...

الوطن زي الام..الذكريات اللي بتكبر جوانا لحظة بلحظة..تاريخ حياتنا يوم بيوم..
اكل الام اللي بنحبة واحنا مش عارفين حلو ولا لأ..لاننا بنكبر واحنا ما نعرفش غيره فا بنحبة ونتعود عليه زي ما هو..
هو ده الوطن.

Tamer Moghazy يقول...

"ما مشيتش فى ضواحيها..؟
طيب ما كبرتش فيها..؟
ولا ليك صورة ع الرمل كانت ع الشط بمعانيها..
دور جواك تلقاها هى الصحبة و هى الأهل..
عشرة بلدى بتبقى نسيانها ع البال مش سهل..
يمكن ناسى لإنك فيها..!!
مش واحشاك و لا غيبت عليها..!!
بس اللى مجرب و فارقها قال فى الدنيا ما فيش بعديها."

شفـقــة و إحســــان يقول...

الف مليون حمد الله على سلامتك
ايه الغيبة دى
وحشتينا
بس ايه الحب والانتماء اللى فى البوست ده
فكرتينى باغنية محمد فؤاد فى فيلم امريكا شيكا بيكا
يعنى ايه كلمة وطن

غير معرف يقول...

معنى الوطن
الانتماء والحب
يعنى مصر الى اتربينا وعشنا فيها ولنا ذكريات واهل وفسح وكل شيء
لكن المشكلة عندنا مش مصر
المشكلة الناس اللى جواها
كل واحد فينا بيحب مصر
بس جايز بتكون قاسية علينا الظروف جواها

Tamer Diab يقول...

بجد قلتي الي كان نفسي اقوله والله في ايجاز شديد وبساطة
الوطن ده حاجة عاملة زي مادة في الدم عند كل واحد عايش في وطنه مادة مرتبطة بوطنه اول ما تيجي سيرته بخير يفرح واول ما تيجي سيرته بشر يولع
بس بجد احنا عشان كلنا حاسين بفقدانه اوي اوي اوي مش فقدانه اننا عايشين بره لا والله ده الي جوه هو الي تعبان اكتر بكتير لان اسوا أحتلال هو الي يبقي من ولاد بلدك
زي لو تفتكري مشهد اخير في عمارة يعقوبيان لما ابن عادل امام مات اول ما قتل الظابط الي عزبة في السجن الاتنين اترموا علي الارض علي بعض والاتنين ولاد بلد واحدة
بجد يا خسارة

فكرة من الزمن ده يقول...

ازيك يامشمشة وحشتيني
جميل البوست بتاعك وحسيته قوي
وفعلا الوطن هو كل حاجة بحلوها ومرها بالاخياء الشيك والاحياء الشعبية والعشوائية
والزبالة ةريحة الزفارة في حلقة السمك حي الجمرك في اسكندرية و الناس النضيفة والشحاتين
وكل حاجة من دي جمعيها جنب بعضها زي البازل او الفسيفساء هتلاقي وطن
ومش بس مصر
لا كل البلاد
الناس مش بتكره مصر
الناس بتشتمها لما بتتزل في عيشتها لكن الحب موجود في قلوبهم
تحياتي

*** حور- نور*** يقول...

أولا كل سنه وانتى طيبة يا ام عشرين سنه وعقبال مليون سنه
ثانيا انا طول النهار بكتب وبتكلم فى الموواويل دى بس نعمل ايه هى دى مصر
ربنا معاكى يا قمر

كيكى عوووووو يقول...

انتى رجعتى امتى يابت انتى
انا شوفت بالصدفة كدة
الف حمد الله على السلامة
اغنيه بتعبر لحبى لمصر
بتاع العظيم شعبولا
انا بكره اسرائيل واقولها لو اعتقل
وايييييييييييييييييييييييه

micheal يقول...

الله يبارك فيكي يا مشمشة
:)
معلش شوفتها متأخر شويتين
بالنسبة لي عندي وجهة نظر مختلفة قد تبدو صادمة
مش بقتنع أوي بفكرة وطن
!
يعني بفضل لو فيه إنتماء يكون لحد بحبه وعندي معاه ذكريات كويسة وفيه إحترام متبادل بيني وبينه أي كانت جنسيته ولا المكان اللي عايش فيه
مش فارقة
أوعي تفتكريني جاسوس
:))

بسنت صلاح الدين يقول...

رغم كل العيوب اللى بننتقدها فى بلدنا بس لما بتحصل اى حاجه او حد يغلط فيها بنلاقى بركان من الغضب بيحركنا عشان ندافع عنها ،، كل ده وضحلى اننا مش زعلانين منها ،، احنا زعلانين عليها

سمسم سماسم سمسومة المسمسمة يقول...

بص ااحة :) .. انا عن نفسي يعني .. اول مرة ادخل مدونة .. وأول مرة اشترك .. والمدونة بتاعتك بصراحة هي اللي خلتني اشترك .. عشان المدونة دي واحدة صحبتي بعتتهالي .. وبما اني مش بعرف اتعامل مع الشيء دة ازاي .. فـ اعذريني يعني لو هببت اي مهيبة :) .. المهم .. وبعدي الرغي اللي مفيش منه اي داعي دة .. عايزة اجاوب العالسؤال .. يني اييه كلمة وطن؟!!
يعني زي ماقولتي بالضبط .. يعني الناس الطيبة .. يعني الراجل اللي يطلع من محله يوم الجمعة يرش مية عشان الطراوة .. يعني العيال اللي بيلعبوا في الشارع ويكسروا القزاز .. :) يعني الطيبة .. يعني الحب .. يعني الأخوة .. بصي انا عايشة برة .. عشان كدة بجد مفتقدة البلد دي اوي .. كنت بمشي في الشارع ولو في نص اللييل .. حاسة ان بين اخواتي .. مش خايفة .. مش عارفة لييه .. مع اني عارفة ان ممكن مليون حاجة تصلي .. بس بحس ان ربنا حاميني .. وان الناس هيحموني .. بس برة .. لو في عز الظهر .. ببقى همووت من الرعب والخوف .. مبعرفش لييه .. وطن يعني هوا مصر ..يعني بحر اسكندرية .. يعي العيلة واللمة والصحاب .. يعني تمشي في الشارع .. مهما كانت كمية الحرامية والبلطجية .. تحس ان في ولاد الحلال اللي هيحموك :)
(رغاية اوي انا ثح؟! ) :D

غير معرف يقول...




صورمشبات مميزه - جميع صورالمشبات راقية وصورالمدافئ والديكورات - مشبات رخام ومشبات طوب .نتميز بالدقة فى أعمال مشبات الرخام والحجر والطوب والمدافئ الأمريكية وجميع ديكورات المشبات
http://shomane.blogspot.com/