الخميس، 18 يونيو 2009

عايز مراتك تحبك



تحديث

مصر فازت على ايطاليا بجون حمص الاسمعلاوى
بجد ان امبسوطة اوى

بس الحكم ابن التييت من كتر ماهو متغاظ ادى الحضرى انذااار

عشان شال بلاوووووووى

يلا مبررروك لينا










ازيكو يا معلمين





عاملين ايه





طبعا تفتكرو معايا البوست اللى فاتت عن البنات بس





واللى كتبت فيه ازاى الحجة تهتم بفوزى جوزها





انهاردة هكلم عن فوزى وازاى يدلع عنيايات مراتو ويهشتكها





بص ياعم الكتكوت





اولا الست اللى فى البيت دى ليها حق عليك





وهتتحاسب عليها





هتقولى مراتى وحشة وريحتها وحشة ومش بتهتم بنفسها





هقولك غيرها انتا





اطلب منها الحاجة اللى نفسك فيها





وحاول معاها انك تغيرها





قولها كلمة حلوة





حسسها انها مرغوب فيها





وانك بتحبها حتى لو شبه خالتك نبوية





وعشان تبدا بكدة





لازم تبدأ بلكلمة الحلوة





ده انتا لو هتقولها قبل ماتنزل الصبح بحبك





متتخيلش الستات هبلة اد ايه





وهتبقا نفسيتها فى السما





وهتلاقيها طول النهار





مرزوعه قدام المرايا عمالة تسلك فى شعرها وتحط كيلو جاز وتموت القمل





اة مستغربوش





بجد





وانت انازل قولها كلمة حلوة





قولها انا هاجى بعد الشغل جرى اقعد معاكى





ابعتلها مسج ع الموبيل





قولها وحشتينى





هستنا اخلص الشغل عشان اشوفك





اعزمها مرة فى الاسبوع برة





مش لازم فى مكان شيك اوى





بس اقل حاجة





لو هتتمشو على الككورنيش وتجيبلها بربع جنيه لب





وكوز درة بجنيه





وحبة مفشر بنص جنيه





يالهوى





يبقا انتا كدة يا معلم تمام التمام





وهتبقا كسبت فيها صواب





قولها انا عمرى ما هشوف واحدة احلا منك





انتى شكلك عجبنى وجسمك وشعرك





كل الكلام ده هيرفع من معنوياتها





بس يا عم الكتكوت





لازم انتا كمان تهتم بنفسك





مش مطلوب من الست تبقا حلوة وانتا تبقا خردة مينفعش





احلق شعرك كدة وظبطو





حط برفان حلو





البس بيجامة نضيفه مكوية مش مكرمشة زى مايكون دايس عليها اتوبيس





خدها واتفرجو على التلفزيون سوا





العبو سوا





اى حركات كدة





والله الستات هبلة بيضحك عليها





حاول تشاركها فى اى حاجة بتحبها





قولها اكلك حلو





هتلها وانت اجاى من برة اى حاجة





لو باكو لبان حتة





تحسسها انك فاكرها





الستات هبلة بيضحك عليها





مفيش مانع تهتم بجسمك شوية





وتلعب شوية تمارين





او تروح جم





وبلاش عفانة وكوزين الاسمنت اللى انتا بتلعب بيهم دول





والله الستات هبلة بيضحك عليهم





ابعتها يوم عند امها





واعملها عشا رومانسى كدة





احنا عارفين انك عكاك ومش بتعرف تعمل بيضة





هات اى اكل من برة





مش مهم اكل





اعمل عصير





اى حاجة





وروقلها البيت





عشان لما تيجى متتعبش فى حاجة خدها فى حضنك كدة وانتا بتوصف فى جمالها





ورقتها حتة لو مراتك وحشة صدقنى هتبتدى تهتم بنفسها





الكلام الحلو ده هو االمفتاح السحرى





والله الستات هبلة بيضحك عليهم





وانتا يخوية مراتك دى حلالك





حيبها





وحاول تشوف اى حاجة فيها كويسة





ولو حياتك وحشة غير فيها





لان لو بصيت برة هيبقا حرام عليك





اكسب حلالك





وعيش مرتاح





وبكدة نكون وصلنا لنهاية حلقتنا سلام





هناك 63 تعليقًا:

*البت المشمشية *حلوة بس شقية * يقول...

اول تعليق لدولا

رحلتنا في الحياة يقول...

حمدلله على السلامة ياقمر نورتى البلوجر من تانى
عندك حق فى كلمة والله الستات هبلة بيضحك عليهم
هههههههههه الست بتحب الشخص اللى يهتم بيها وكل شوية يمدحها من وقت لتانى مينفعش يقول انا كده بعبر عن حبى بتصرفاتى مينفعش لازم كمان بالكلمة الكويسة هتبسطها جدا

Bola 7elmi يقول...

:)
طيب انا تاني تعليق بقى
على قولتك والله الستات هبله وأي حاجه بتفرحهم لو باكو لبان
أهم حاجه انهم يحسو انو مهتم وفاكرهم
بس مش عارفه ليه الرجاله ببعقدو الموضوع وديما محسسني ان الست دي مخلوق عجيب ومش مفهوم ..!!
موضوعك حلو أووووي :)

سلامي ليكي :)

Maryama Qandil يقول...

ههههههههههه

يا نهارك ملون مع كلور بالالوان
قولتي كام مرة الست هبلة وبيضحك عليها

على فكرة مش كلهم الي هيقعد في البيت بس

طبعا احيك على البوست وتضمنك لفكرة اكسب حلالك لان برى هيكون حرام وهتتحاسب عليك وهيبوخ حياتك ويدمرلك عيشتك وزواجك وهلم جرى بقى من هذه الموااويل

بس برده اكيد الموضوع السعادة مش بالشكليات فحسب مش مجرد تبقى شكلها حلو وهو ميبقاش خردة
لازم اضافة الاعتلاء الروحاني الي بينهم والفكري بذلك
يعني ميسكش على مراته ويقعدها في حصن مجيد متين ويطور نفسه فحسب
يمشي معاها خطوة خطوة لو معارض عملها
عشان ميحسسهاش بالنقص في العمل

من الاخر يا نساء العالم اشتغلووووووا
:D

تسلمي على البوست وطبعا عودا احمدا يا طاطا ( حد عنده اعتراض)

وردشان smilyrose يقول...

السلامة عليكم

انتى عارفة يا مشمشة لما بقول لزملائى

الكلام دا بيقعدو يتريقوا ويقولو انى

رومانسية وانى على البر وبكرة يتفرجوا

هكون عاملة ازاى وممكن اكون زيهم

بس واللهدا كله بيتوقف على كل طرف

يعنى الكلمة الحلوة ليها تاثير كبير

سواء على الرجل او الست

يلا ربنا يستر

وحشتينى

وردشان

عاشقه الرومانسيه يقول...

ماااااااااااشى
يعنى حاجزه اول تعليق
لدوله قبل مايجى
مااااشى
بلد وسايط صحيح
حلو البوست ياسكره
وهاوريه لخطيبى علشان يتعلم
هو رومانسى جدااااا
بس مين عارف يمكن بعد الجواز يتحول

بسنت صلاح الدين يقول...

خلاص والله عرفوا اننا هبل و بيضحك علينا ده انتى ناقص تحلفى ميت يمين كمان هههههههههه،والله يا عسل عندك حق اى حاجه بسيطه بتسعد الست و تطلعها سابع سما اقول ايه بقى ،ماحنا هبل و بيضحك علينا هههههههههه

شقاوة مراهقة يقول...

ههههههههههههههههههههههههههههه
ههههههههههههههههههههههههههههه
هههههههههههههههههههههههههههه
هههههههههههههههههههههههههه

البوست كله البنات هبله وبيضحك عليهم


البوست حلو ماشي ..

بس انا جايه اباااااااااااااااارك لمصرررررررررررررررررر..

مصر فازت على ايطاااااااااليا يا جدعاااااااااااااااااااااااان ..

الف الف الف الف الف مليووووووووووووووووووون مبرووووووووووووووووك ..


بجد انا مبسوطه قووووووووووووووووي


الف مبروووووووك يا اجدع نااااااااااااااااس يا مصرررررريين

Adel Mody يقول...

والله الستات دول هبل بيتضحك عليهم

هههههههههههههههههههههههههههههه


حمدالله على السلامة يا مشمش

موضوع بصراحة جامد لو الرجالة كلهم قرأو الكلام دة هيعيشو حياتهم مرتاحين من النكد والكلام الفاضى دة

سلامم

Unknown يقول...

والله نصايح طيبة

وإن شاء الله تنفعنا

mohamed ghalia يقول...

كلام فى الصميم
تسلم ايدك بجد على كلماتك دى

Unknown يقول...

أنا أعترض على كلمة الستات هبلة وبيضحك عليها
بس نصايحك في الصميم فعلا

ربنا يكرمك بس مش لما أتنجوز الاول
أنا عاوز ازاي البنات تحبك
هههههههههههه
خالص تحياتي

adel يقول...

ياجماعة انا دولا
و انا اول تعليق
ايه التقطيع ده يا دودو بس ؟؟؟

ميرسي يامشمشية يا قمر :):):)
كفأة بجد و صديق الصدوق :):):)

بس مين دي اللي انا انضفلها البيت
احنا هنهزر
بس لو علي الدلع انا مبتوصاش
انا مش ناوي اتجوز بس لو ربنا اراد
انا متاكد اني هخليها اسعد واحدة في الدنيا
قبل ما اطلقها علي طول

ههههههههههههههههههههههه

لا بجد بس انا متاكد من اني هدلها دي لو بعد الشر جت

بس والله البلوجر نور و اتملي ضحك و هزار من تاني :):):)

عودة احمد
او علاء

حائر في دنيا الله يقول...

أول مرة أزورك
وللصدفة أول مرة اتفق معاكي ان الست فعلا "هبلة"وبيتضحك عليها من أقل حاجة بس المشكلة في "نفسية"الراجل اللي يعرف يضحك عليها ويحسسها بالأهمية والقوة والاحترام والحاجات دي كلها

لك تحياتي
السلام عليكم

Hanan Elshafey يقول...

مشمشه
كلامك حكم يابنتي لو سمعوا كلامك يبقو كسبو السعاده الابديه

Unknown يقول...

كلام جميل
و نصايح اجمل

شكراً ليكى

MaNoOoSh يقول...

ايه ده بقى يا مشمشية
عااااااااااااا


لا بقى انا اعترض واشجب كمان
هو ايه ده اللي كل شوية "والله الستات هبلة بيضحك عليهم"


لااااااااااااااااااااااا
احنا بيتضحك علينا صحيح.. بس بمزاجنا يعني مش اى حاجة

بس فعلا كلام يخللي الست غصب عن حباب عنيها تحس على دمها وتهتم بمنظرها وشكلها

gogo!sf يقول...

اولا يا مشمشه البوست يجنن
والاسلوب كمان رائع ومضحك جدا

عجبنى اوووووووووووووى

بصى كل اللى انتى قولتيه صح بس لو الست عندها استعداد انها تهتم بنفسها فعلا لكن لو هى اساسها مهمل فى بيتها وفى نفسها عمر الكلام الحلو ما هيجيب نتيجه وده بيرجع للست اكتر من الراجل
عشان ببساطه كده الست لو مهمله ولو مش مريحه جوزها وحاول معاها كتير ومفيش فيها فايده هيبص بره وهيشوف غيرها

بوست بجد جميل اوى

ملحوظه

الستات فعلا هبله وهطله وبيضحك عليها بسرعه حتى لو جوزها جاب لها حزمه فجل مش ورده

تحياتى يا قمر

جوجو

غير معرف يقول...

عوده قويه يا مشمشيه
بس ايه حكايه الستات هبله...... الستات هبله ...... كده الرجاله هيصدقوا

*البت المشمشية *حلوة بس شقية * يقول...

ايوشة
ههههههههههههه
احنا طيبيبن اوى والله

*البت المشمشية *حلوة بس شقية * يقول...

Bola 7elmi
الرجالة بردو معذورين
وعايزين ذقة

*البت المشمشية *حلوة بس شقية * يقول...

Rooma Qandil
اكيد طبعا العلاقة الروحانية اكبر واسمى من الشكليات انا معاكى

*البت المشمشية *حلوة بس شقية * يقول...

smilyrose
دى مش رومانسية دى اقل حاجة ممكن الراجل يعملها ا للست والعكسس

*البت المشمشية *حلوة بس شقية * يقول...

عاشقه الرومانسيه
اة دولا اول تعليق عشان دولا حبيبى
حد عندو اعتراض

*البت المشمشية *حلوة بس شقية * يقول...

بسنت صلاح الدين
ههههههههههه
احنا مش هبل يا بوسى
بس طيبين وبنرضا بأقل حاجة

*البت المشمشية *حلوة بس شقية * يقول...

شقاوة مراهقة
مصر كله امبسوطة عشان كسبنا

*البت المشمشية *حلوة بس شقية * يقول...

Adel Mody
يارب يستافدو منو

*البت المشمشية *حلوة بس شقية * يقول...

Ahmed Talk
ان شاء الله

*البت المشمشية *حلوة بس شقية * يقول...

mohamed ghalia
اشكرك

*البت المشمشية *حلوة بس شقية * يقول...

كاتب مصري هههههههههههه
هتلاقى بوست للبنات بس ابقا اقراه

*البت المشمشية *حلوة بس شقية * يقول...

adel
اشطة يا معلم اول تعليق اهو
وابقى قابلنى لو واحدة عبرتك اساسا
انتا عقد
ومفيش واحدة هترضا بيك
يااااض انتا
بس انا متاكدة او اتخبط فى نفوخك
هتكون البنت دى اسعد واحدة فى الدنيا

*البت المشمشية *حلوة بس شقية * يقول...

حائر في دنيا الله
المشكلة كلها عند لراجل

*البت المشمشية *حلوة بس شقية * يقول...

حنان الشافعي
عندك حق يا حنون

*البت المشمشية *حلوة بس شقية * يقول...

بدراوى
العفو على ايه

*البت المشمشية *حلوة بس شقية * يقول...

MaNoOoSh
ههههههههههههههههه
انا مقولتش حاجة
ماهوكلو بمزاجنا

*البت المشمشية *حلوة بس شقية * يقول...

gogo!sf
ههههههههههههه
حلوة حزمة الفجل
دى
ضحكتينى

*البت المشمشية *حلوة بس شقية * يقول...

فتاه من الصعيد
ماهما الرجالة عارفين كل حاجة

Darsh Basha يقول...

الستات هبلة واى حاجة بتفرحهم
دة مسموش هبل..دا ممكن نسمية قناعة
ودى حاجة كويسة ..مش وحشة
على العموم الموضوع جميل جدا
بجد ...وبيبن الحاجات الكويسة ..وتوطيد العلاقة بين لزوجين
وان شاء الله دى هحطها حلقة فى سنانى
قصدى ودانى ...علشان لما اتجوز ان شاء الله

تحياتى

غير معرف يقول...

اول مرور لى عندك
واول مادخلت اتكعبلت فى البوست
الجميل ده نصائح غالية ويارب
الرجالة تنفذ
مبسوطة لمرورى عندك وواضح انك حلوة وشقية
تقبلى مرورى وتحياتى

راسبوتين يقول...

والله كل كلامك مظبوط بس يسمع ويفهم
شكرا ...أرجو قبول مرورى

حاسوباتيه يقول...

ده ايه الحكم دي بس عندك حق احنا هبل والله وغلبانين وبنصدقهم على طول وبنرضى باقل حاجه بس تقولي لمين بقى نفسي يخلو عندهم دم ويحسوا بكده يارب

V.Hayat يقول...

ربنا معانا هبل × هبل
وبعدين

تحياتى

مامة مازن يقول...

اهلا برجوعك من جديد نورتى مدونتك خفيفة الظل
انتى زى ما بيقولو سيحتى الدنيا
احنا هبل اه جدا وباكو لبان فعلا بيعمل سعادة هبلة غير عادية وخاصة لو بطعم بتحبيه كمان يا سلام سلم
حب حلالك احسن كلمة قولتيها

ياسر سليم يقول...

اظن كده انتى خلصتي امتحانات ؟

انتي عارفة يا مشمشية غالبية الناس ان لم يكن كلهم بتلاقيهم قبل الجواز يقولوا احنا اللى ما حدش زينا .. الناس دى كلها كوم واحنا كوم تاني .. الناس كلها متعقدة من الجواز لكن احنا هنبقى عصافير .. ويمر كام يوم على الجواز والكلام يبدأ يتنسي .. وتلاقيهم يقولوا يعنى هما الناس كلها يعنى كانت غلط واحنا اللى صح ؟

تدوينة جميلة وياريت كل الرجالة ييجوا يسمعوا نصايحك اللى من ذهب دى

طوبه فضه وطوبه دهب يقول...

والله بجد بجد تسلم ايديكى وبرافو عليكى على الكلمتين الحلوين دول والنصحتين المفيدين موضوع جامد ومهم جدا والله

فشكووول يقول...

ازيك يا مشمشيه
قال كوز دره قال بجنيه
دا يا بنتى لو جبت للحاجه لبن العصفور مش طايقانى ومش قابلانى وعايزه كل يوم ترقعنى جوزين اقلام على وشى قبل ما اخرج للشغل ولا فيه حاجه خالص واخده فيها لا كلام حلو ولا كوز دره ولا حته غويشه دهب
اصل انتى لسه غلبانه ما شفتيش الرجاله بتعمل فيهم ايه
تحياتى يا مشمشيه

Tamer Diab يقول...

والله عندك حق
كبهم هبل وبيضحك عليهم
p :
بس هي تيجي وانا اعملها هندي في البيت هههههههههههههههههههههههه
والله كلامك صح طبعا لو كل واحد فكر في غيره عايز ايه مش هو عايز ايه
غيره هيعملوا الي هو عايزة.
تسلميلنا دايما كده علي الكلام الجامد.

يوميات شاب منوفى يقول...

ماشى نسمع كلامك بس بعد مانتجوز افرجها علينا يارب



انشاء الله مصر تفوز على امريكا النهاردة

غير معرف يقول...

السلام عليكم

كل شوية والله الستات هبلة وبيضحك عليها
انا اول مرة قلت ماشى تانى مرة ماشى تالت مرة حلفت يمين ان انا مصدقك

بس مش كل الستات هبلة بدليل انك واحدة منهم وعارفه انهم هبل واللى بيعرف حاجة مينفعش يكونها علشان كدة مينفعش يضحك عليكى

بس ده ميعنيش ان الكلام الحلو مبيجبش معاكى

عامة الكلام الحلو بيأثر فى كل الناس مش الستات وبس

تحيتى

*البت المشمشية *حلوة بس شقية * يقول...

عرفة فاروق السيوطى
هههههههههههههههههه
حاولت افهم معظم الكلام اللى كتبتو مفهمتش

*البت المشمشية *حلوة بس شقية * يقول...

يوميات شاب منوفى
يارب يتجوز واحدة تقدرك
مصر خسرت من امريكا 3/صفر

*البت المشمشية *حلوة بس شقية * يقول...

Tamer Diab
هههههههه
شكرا يا تمور
ربنا يوعدك بوحدة تعملك هندية هيا كمان

*البت المشمشية *حلوة بس شقية * يقول...

فشكووول
ههههههههههههههههههههههه
ايه ده يا حمايا
لالالاء
حماتى ملهاش حق
بقه حد يبقا عندو راجل زى العسل كدة
وتبقا عايزة تديلو جوز اقلام
مينفعش
امال صعلوك فين

*البت المشمشية *حلوة بس شقية * يقول...

طوبة ذهب وطوبة فضة
تسلمى يا قمر

*البت المشمشية *حلوة بس شقية * يقول...

ياسر سليم
طبعا كلامك صح
ويااريت مننساش ان الحياة بردو تلاهى

*البت المشمشية *حلوة بس شقية * يقول...

مامة مازن
ربنا يخليكى يا قمر
والحمد لله
ان البوست عجب حضرتك

*البت المشمشية *حلوة بس شقية * يقول...

حياة
هههههههه
تحياتى ليكى

*البت المشمشية *حلوة بس شقية * يقول...

حاسوباتيه
يارب يختى يحسو على دمهم
ههههههههه

*البت المشمشية *حلوة بس شقية * يقول...

راسبوتين
منورنى دايما

*البت المشمشية *حلوة بس شقية * يقول...

أم مالك
بس يارب بقه تفضلى تنورينى دايما

*البت المشمشية *حلوة بس شقية * يقول...

mosooz
ههههههههه
ايوة حطها حلقه فى سنانك
يارب كل الرجالة يفهمو

جلال كمال الجربانى يقول...

برافو عليكِ والله
الكلمه الحلوه ليها مفعول أكيد
بس يارب تفتكرى النصائح دى
لما ربنا يكرمك
وبعدين يرزقك بثلاث أو خمس عيال
وأبوهم كمان
انتِ حلوه صحيح بس رومانسيه

تحياتى

Ashraf Hamza يقول...

والله كلام رأيك 100%. بس تفتكري كام واحدة في مصر أو حتى في العالم العربي ممكن تعمل نص النصائح دي!!؟

احنا عندنا أزمة في الذوق العام والله, سواء رجالة ولا ستات على حدا سواء.

على فكرة أنا عرفت المدونة دي عن طريق خبر كان منشور على الس ن ن العربية...